Palace leh Brighton an inhnehtawk - boruak a 'hot'

Brighton & Hove Albion-in Premier League hmahruaitu nihna remchang nei mah se hun tawp dawna si phurh sutna goal an khung avangin an hlim ta zawk a, Crystal Palace nen 1-1 in an inhnehtawk.

Wilfried Zaha-a'n penalty hmanga goal a khung chu Palace hian an chakpui mai dawn niin a lang hman a, mahse, hun pek belh minute nganaah Neal Maupay chuan si phurh a rawn sut.

French forward Maupay-a'n Palace fans tihel chungin a goal khung a lawm a, Zaha nen an buai zui - inkhel tawp hnuah pawh team pahnih inkarah buaina a chhuak a, Brighton player-te leh Palace fan-te an buai bawk.

Brighton-in chak lo tura an inngaih hnuah point an hlawh chhuak a, table-ah parukna an ni a, hmahruaitu chu Liverpool an ni. Hriat tel tur erawh pakhatna Reds leh parukna Brighton inthlauhna hi point khat chiah a ni.

Team danglam Palace
Palace leh Brighton inkhelah boruak a sang ziah - nikum October thlaa an inhmachhawn khan Alexis Mac Allister-a'n minute 90-naah Brighton si phurh sutna goal a lo khung tawh a, 1-1 in an inhnehtawk.

February-ah team pahnih an intawng leh a, Palace vanneih zan a ni thung. Christian Benteke chuan hun pek belh minute nganaah goal a khung a, 2-1 in Palace a chakpui daih.

September, 2021 a thlen meuh chuan Brighton-in hun pek belhah bawk point an hlawh chhuak a, boruak pawh a dan ngaiin a sang reng - thil danglam pakhat erawh a awm. Season hmasa an intum pahnihah Brighton-in chak an phu zawk ve ve a, Palace an vannei zawk.

Tun season-ah erawh Patrick Vieira kaihhruaina hnuaiah Palace khelh dan a danglam tawh a, goal nawr an ngam a, ball an in pass nasa bawk - Roy Hodgson-a hnuaia counter-attacking football chu an thlak danglam a, an hmuhnawm ta viau.

Zaha phawt
Goal khung loin chawlhlawk an hmang mai dawn emaw tih hnuah Leandro Trossard chuan Conor Gallagher laka a foul avangin penalty a chawi a, first half hun pek belh minute hnihnaah Zaha chuan goal-ah a chantir.

Kum 28 mi Zaha-a'n Brighton laka goal riat a khungna chiah a ni a, tun season Premier League-ah match ruk khela goal hnih khungin assist vawi khat a nei tawh. Palace tan Jordan Ayew-a'n chance duhawm nei mah se a hlah a, a tawpah an tawrh phah.

Brighton an khel ṭha lo a, Steven Alzate-a'n second half-ah Dan Burn thlakin, tlarhnung pathum chu paliah an siam rem a, an khel ṭha sawt. Alzate hi minute 65-naah hiam vangin lakchhuah leh tho ngai mah se an khelh dan ngaiin Brighton an khel zui a, an chesual lo.

Shane Duffy-a'n si phurh sutna remchang a neih chu Palace keeper Vicente Guaita zawnah tauh mah se Guaita a chesual zui a, hun tawp dawn tawhah defender Joel Veltman chu ball a pe a, Veltman hian Maupay tana siamsak zuiin French forward a chesual lo - si phurh sutna goal a khung a, Palace tan insangmar leh turin hun a awm tawh lo a, an inhnehtawk.

Buaina ral lian
Maupay-a'n goal a khungin a bengah a kut pahnih a dah a, Palace lam hawiin a goal khung a lawm hmasa - hei hi Zaha-a'n penalty a chhuih luha a lawm dan chiah a ni. Zaha nen an intibuai zui a, boruak a sang hle.

Kum 25 mi forward chuan, "Fans leh player-te boruak tel chuan football hi engmah a ni lo. Boruak kha a rit em em a, goal ka khung khan Zaha lam enin ka nui - goal a khung khan kan fan-te lam hawiin a lawm miau alawm," a ti a, Zaha chu a chet dan avanga tih el a nih thu a sawi.

Maupay leh Zaha boruak a dai zui dawn emaw tiin khawvelin a thlir a, mahse, inkhel tawpna hamrik a rik rualin team pahnih player-ta an inhmachhawn zui leh a, Brighton keeper Robert Sánchez leh Palace midfielder James McArthur te an incho hle!

Hei chauh a ni lo - dressing room lam pana Brighton player-te an chhuk thlak laiin Palace fan-te an lo au nawmnah a, Brighton player an ngawih bik loh avangin boruak a sosang viau bawk.