Argentina-in EPL player pathum an ko

United Kingdom-in hripui leng vangin inkaihhruaina khirh tak la kalpui mah se, Argentina chuan World Cup qualifier khel turin Premier League player pathum - Aston Villa goalkeeper Emiliano Martinez bakah Tottenham player Giovani Lo Celso leh Cristian Romero te a ko.

Thla hmasa khan English club ṭhenkhat chuan South Amercian player bakah, hri leng hluarna hmuna match neite chu zin chhuah an phalsak lo a. UK-in hri leng hluarna hmun nia a ngaih ram zinte chu, an rama an let leh hnuah ni 10 a khunghran vang a ni.

Argentina hian October 8-15 chhungin Paraguay, Uruguay leh Peru te an hmachhawn dawn. Tottenham leh Villa hian an player-te hi an chhuah tir a nih chuan, international break zawha league match an khelh leh hmasak berah an chhawr thei dawn lo.

Lionel Scaloni enkawl Albiceleste hian Copa America nomawi an chawi a, inelna lian zawk FIFA World Cup pawh chawi tumin an boruak a ṭha hle. Qualifier an khelh tawh chinah pahnihna an ni mek a, point 18 an nei. An chungah hian match riat khelh tawh china la chak vek Brazil an awm.

World champion vawi hnih ni tawh Argentina hian player 30 an ko phawt a, koh zingah hian hliam vanga inkhel thei lo mek Paulo Dybala pawh a tel - inhnukdawk leh inlan thei lo chu an awm leh ngei dawn.

Argentina squad:
Goalkeepers: Franco Armani (River Plate), Emiliano Martinez (Aston Villa/ENG), Juan Musso (Atalanta/ITA), Esteban Andrada (Monterrey/MEX)
Defenders: Gonzalo Montiel (Sevilla/ESP), Nahuel Molina Lucero (Udinese/ITA), Juan Foyth (Villarreal/ESP), Lucas Martinez Quarta (Fiorentina/ITA), German Pezzella (Real Betis/ESP), Cristian Romero (Tottenham/ENG), Nicolas Otamendi (Benfica/POR), Lisandro Martinez (Ajax/NED), Marcos Acuna (Sevilla/ESP), Nicolas Tagliafico (Ajax/NED)
Midfielders: Rodrigo De Paul (Atletico Madrid/ESP), Exequiel Palacios (Bayern Leverkusen/GER), Leandro Paredes (Paris Saint-Germain/FRA), Guido Rodriguez (Real Betis/ESP), Nicolas Dominguez (Bologna/ITA), Giovanni Lo Celso (Tottenham/ENG), Alejandro Gomez (Sevilla/ESP)
Forwards: Angel Di Maria (Paris Saint-Germain/FRA), Lucas Alario (Bayern Leverkusen/GER), Paulo Dybala (Juventus/ITA), Lionel Messi (Paris Saint-Germain/FRA), Lautaro Martinez (Inter Milan/ITA), Angel Correa (Atletico Madrid/ESP), Joaquin Correa (Inter Milan/ITA), Nicolas Gonzalez (Fiorentina/ITA), Julian Alvarez (River Plate).