Real, Barca & Juve lakah UEFA a tlawm!

European football-a thuneitu sang ber UEFA chu Real Madrid, Barcelona leh Juventus lakah a tlawm zawkah a ṭang a, UEFA hian club pathum laka thubuai a siam zawng zawng chu a hnukdawk a ni.

Real Madrid, Barcelona leh Juventus te hi European Super League din tumtu club 12 zinga mi an ni a, club dang pakua an inhnuhdawh hnuah pawh inhnukdawk ve duh loin an ruahmanna hi kaltlangpui an tum.

Hei vang hian club pathum hi UEFA dan pal-zutah puh niin chhui mek an ni a, mahse, European football thuneitu sang hian club lian pathum thubuai chu ngaihtuah tawh loh tur a nih thu an puang ta a ni.

UEFA chuan, "Hma kan lo lak tawhna chu thil thleng lo anga ngaih tur a ni," an ti a, hetianga an tih chhan hi Madrid court-in UEFA chu club pathumte hrem lo tura an hriattir vang a ni ber.

Hetiang a nih takah chuan UEFA chuan club inhnukdawk pakuate sum chawi tura a tih pawh chu a la la dawn rih lo a; Arsenal, Chelsea, Liverpool, Manchester City, Manchester United, Tottenham Hotspur, Atletico Madrid, Inter Milan leh AC Milan te chu UEFA hian football hmasawn nana sum thawh turin a lo hrem tawh a ni.

April thla khan Madrid khawpuia Court chuan Real, Barca leh Juventus te chu thiam a lo chantir tawh a, UEFA zawk chu European free trade law bawhchhiaah a lo puh tawh a, tunah hian European Court of Justice lam chuan an ngaihtuah mek.

Hetianga thubuai kalpui mek a ni chung hian Madrid court thupek zawmin UEFA chuan anmahni lama thubuai an siam chu an titawp rih a, club-te sum chawi tur pawh chu Court-in thubuai chiang taka a chinfel hma chu an chawitir rih dawn lo a ni.

UEFA chuan heti chung hian club ho chunga hma an lak danah dan bawhchhiat emaw kalphung pangngai pel emawa chetna an neih loh thu an sawi a, "UEFA chuan hlauhthawnna a nei lo a, dan hmaa inlan ṭulna apiangah a dinna ngaia ding turin a inpeih a ni.

"UEFA mai ni lo, football khawvela inhnamhnawih zawng zawngte ṭhatna tur ngaihtuah chung zelin UEFA chuan hma a la zel dawn a ni," an ti a, ESL club luhlul pathum an hlim rih.