Napoli 1-0 Juve : Match li; 1 point Serie A nomawi chawi tur a la chiang lo

Pathianni zan a ni a, Turin khawpuiah Juventus leh Napoli an inkhel. Team pahnih inthlauhna chu point li chiah a ni a, Juventus chu Serie A hmahruaitu an ni. Napoli-in hnehna an chan chuan point khat chiahin Turin club hi an thlau tawh dawn tih an hria a, club innghahna khawpui Naples mipuite thin thiin an awm lo.

Minute 90-na a ni a, Juventus beisei loh thil a thleng. Kalidou Koulibaly chuan tun season-a a league goal ngana ni turin goal pawimawh a khung, Napoli player an lam a, Naples khawpui a nghing. Juventus Stadium a reh duk a, kum 1990 hnua a vawi khat nana Napoli-in league nomawi chawi an beiseina chu tih nun tharin a awm leh ta.

Serie A-ah Juventus leh Napoli-in match li chauh khelh tur an nei ve ve tawh a, an inthlauhna chu point khat chauh a ni tawh. Napoli hmabakah Fiorentina, Torino, Sampdoria leh Crotone an awm a, Juve la tum turte hi Inter Milan, Bologna, Roma leh Verona an ni–a tawi zawnga sawiin Juve hmabak a hautak zawk.

Naples khawpui an lam
Niminah Napoli player-ten an club innghahna Naples khawpui lam an pan a, champion ang maiin fan-ten aiport-ah an lo lawm. Airport-ah Napoli fans pungkhawm zat ringawt hi 10,000–20,000 inkara chhut a ni.

Naples khawpuiah chuan Juventus an hneh khan khawlaiah mipui an pungkhawm a, halmawi chi tin reng nen Juventus laka an chak an lawm. Football legend Diego Maradona hoin Napoli hian 1987 leh 1990 khan Serie A nomawi an lo chawi tawh a, hemi hnuah erawh an la chawi leh lo–heti taka fan-ten Juve laka an chak an lawm hi a awm lo hran lo.

Mahse, Napoli coach Maurizio Sarri erawh a la ṭawng fimkhur fan a, kum 59 mi manager chuan, "Fan-te hlimna kan thlen avangin tun dinhmunah chuan ka hlim takzet. Mahse, engkim hi Juve kutah a la awm a, kan inkhelh leh tur chiah keini chuan kan ngaihtuah ang," tiin inkhelh zawhah a sawi.

Sorry Sarri
Kum 59 mi Maurizio Sarri hian 2015 khan Napoli hi a enkawl ṭan ve chauh a, top flight football-a season khat chiah la hmang coach hi Napoli enkawl tura ruat a nih tirh khan club legend Diego Maradona ngaihdan a ni lo hle.

Napoli tana season sarih chhung khel player ropui hian, "Sarri enkawlna hnuaiah Napoli hian eng nomawi mah an chawi lo ang. Sarri Napoli hian he club tana ka season hmasa ber kha min hriatchhuah tir a, relegation kan sual a nih kha," a ti a, Italian coach chungah beiseina a nei sang lo.

Mahse, 2015-16 season laihawl an thlen meuh kha chuan Maradona hian ngaihdam a dil a, "Sarri chungchanga ka thusawi avang khan ngaihdam ka dil a, ka lo ring sual a ni," a ti!

Tu nge Sarri?
Maradona meuhin hetiang taka a duh loh coach hi tu nge ni? tih chu zawhna awm thei a ni a, a chhanna awlsam ber chu '2015 hmalama tu khawkha hriat loh' tih hi a ni. 2015-16 season ṭan dawna coach atana lakluh a nih khan Napoli fan-te pawhin beiseina an nei sang lo–club tenau Carpi tih lohah chuan Serie A-a season ticket hralh tlem ber an ni!

Naples mipuiten Sarri enkawlna hnuaia Napoli hmuh an chak lo a, ram ropui a hruai thlen theih an ring lo. Mahse, he khawpuia piang leh seilian, Napoli ṭan rumruttu coach hian manager tam takin an ken tel loh a nei–Napoli hmangaihna, thinlung leh rilru zawng zawnga inpekna; chu chu hmanraw hlauhawm ber atan a hmang tlat si.

Kum 59 mi hi Napoli coach tura lakluh a nih khan season khat atan chauh contract ziahpui a ni a, Serie A coach dang nena khaikhinin a hlawh tlem em em bawk. Hemi chungchang reporter-in zawhna a pek erawh, "I fiamthu chu a ni em lo maw? Inhlawhfa ṭhin fapa ve mai ka ni a, ka mamawh aia tam alawm ka hlawh! A nihna dik takah chuan zanah, hnathawh banah tuna ka coach hna hi chu hlawh nei lo pawhin ka thawk duh ang," a ti!

Zinkawng ngaihnawm
Sarri zinkawng ngaihnawm zawng zawng hi ziak vek dawn ila hmunin min daih lo. Hnathawhna lamah chuan banker a ni a, Switzerland, Luxembourg leh England-ah te banking hna thawkin a awm kual tawh.

Mahse, a hnathawhin hlimna tak tak a pe lo. Chhunah office a kal a, zan lamah football club enkawlin coaching hna a thawk ṭhin a, hetih chhung zawng hian professional club a enkawl ngai lo. Kum 2002 khan a bank hnathawh a bansan ve chauh a, tihtakzetin coaching a luhchilh ṭan–Sansovino chu a hmingchher tak tak ṭanna niin non-league club hi fourth division-ah a inhlankaipui.

Fourth, third leh second division vela a tal laiin 2012 khan Serie A lama kir tum Empoli-in an lalut a, a season hnihnaah Italian top flight football khel turin a hruai kir nghal. Empoli hi an budget tlem avangin relegate lehnghal tura ngaih ni mah se 15-na dinhmun a luahpui a, Napoli-in an lakluh phah–a bak zawng hrilh nawn kan ngai tawh lo.

Sarri is injurious to health!
Italian manager hian chanchin ngaihnawm tak tak karah chanchin danglam pawh a nei nual–meizial heh tak a ni a, team a kaihhruai laiin mual sira a mei zu lai hmuh tur a awm fo!

Tun season UEFA Europa League-a RB Leipzig nen an inkhelh dawn khan German club hian Napoli coach-in mei a zuk theihna tur hmun a hranpain an lo siam sak thlap.

Football khawvela meizuk avanga hriat hlawh chu Barcelona legend Johan Cruyff kha a ni. March 24, 2016-a chuap cancer vanga thi footballer ropui hi 1991 khan a mei zuk nasat avanga a lung ṭha lo avangin zai a lo ni tawh a, "Football hian ka mamawh zawng zawng min pe a, ka mei zuk nasat luatah ka chan vek ṭhelh a ni," tiin a lo sawi tawh.