Arsi lian liam mai tur Arsene

Khawvelah kumhlun tur thil a awm lo a, hringnunin a ken tel lian leh langsar tak pakhat chu 'Inṭhenna' a ni. Arsenal leh Arsene Wenger an inṭhen dawn tih a chiang tawh a, French manager hi Gunners a pan tirhin a thawm lian hluai lo mah se kum 22 chhunga a hna thawhte avangin a chhuah dawn meuh chuan 'Arsi lian' herliam tur ang mai a ni ta!

"Premier League manager awm tawhte zinga ropui ber pakhat" tiin Sir Alex Ferguson chuan Wenger chungchang a sawi a, Manchester United manager hlui thu sawi hian a sawifiah thui hle. Gunners legend Thierry Henry pawhin, "Thaichhiat rual loh hnuhma a hnutchhiah," tiin a sawi bawk.

Tu nge Arsene?
August 1996 khan Arsenal-in Bruce Rioch an ban a, Stewart Houston leh Pat Rice ten team enkawl hna an thawk lailawk. Barcelona manager hlui Johan Cruyff chu Gunners enkawl tura ngaih hming langsar a ni.

Mahse, Arsenal vice chairman David Dein erawhin ngaihdan dang daih a nei thung. October 1996 khan an manager thar tur a lalut a, a hming chu Arsene Wenger a ni a, ani hi Japanese club Nagoya Grampus enkawl mektu a ni a, khawvelin a la hmelhriat ngai lem lo.

Team ropui ve tawka inngai Arsenal tana khel lai player ṭhenkhat ten an manager thar hi an duh lo a, thuthar thehdarhtu lam pawhin an dim vak lo. The Evening Standard chuan headline atan "Arsene Who?" tih an hmang a, tun thlengin sawi zui a hlawh hle.

Arsenal captain ropui Tony Adams chuan, "Tarmit a vuah a, football manager ai chuan school zirtirtu a ang zawk," tiin Wenger a hmuh hmasak dan a sawi. England international hlui hian Wenger-a kaihhruaina hnuaiah Premier League leh FA Cup nomawi pahnih a chawi a, thawnthu ropui ziah nana bul ṭantu pawimawh an ni.

Adams hian an manager hlui a chawl dawn tih a hriat rualin amah uina thu a chhak chhuak nghal, "Arsene thil engkim avang khan ka lawm. Arsenal manager awm tawh zinga ropui ber i ni," a ti. A tira amah hre lotu hian Arsene chu tunge a nih a hrechiang ta hle.

Kalphung thar
Arsene Wenger-a'n rilru leh tihtakzetin hnathawh a duh a, khelmuala result nei ṭha tur chuan a pawn lamah kalphung dik leh nghet neih a pawimawh zia a hria–transfer, contract leh training session chungchangah thuneihna pek a ni bawk.

Player langsar leh lian tak tak awmna Arsenal-in training an nei urhsun tawk lo a, hun rei tak chhung awmze nei loin hun an khawhral fo. Wenger a lan chinah erawh training hun tih tawi a ni a, mahse an hun neih chhun chu thiam takin an hmang thung; ngawrh takin attacking game an zir ṭhin.

Arsenal player leh staff-te chuan match an neih loh nia zu in ho chu kalphung atan an nei a, a huhoin zu an in dar dar ṭhin. Pa invawng tak Wenger-a'n a huhoa zu in a titawp a, ei leh in kawngah pawh danglamna a thlen zui zel bawk. Inkhelh hmaa ei atan 'pasta' a chhawp chhuak a, 'red meat' (sa ti sen bawngsa, vawksa, kel sa etc.) leh 'junk food' (kawng kam chaw) an ei ṭhin aiah 'Arsa chhum' a eitir bawk.

Hlawhtlinna
Arsene Wenger hian player langsar leh lian ai chuan chher choh theih tur a lei tlangpui a, an elpui club dangte nena khaikhin chuan sum a hmang hnem ngai lem lo. Arsenal a enkawl tirhah midfielder Patrick Vieira leh Remi Garde te a lalut a, anni pahnih hi hlawhtlinna a chan theih nana mi pawimawh zingah an tel.

A player lakluh langsar leh hlawhtling zawng zawng hming tarlan sen a ni a lo a, club tana goal khung hnem ber Henry (226 goals) bakah Emmanuel Petit, Nicolas Anelka, Dennis Bergkamp leh Ian Wright te chu a hun hmasa lama a player neih ṭhat an ni.

Attacking game khel thiam hmingthang Wenger hian football hmuhnawm a lantir ṭhin a, Gunners a enkawl tirh aṭanga tun thlengin a kalphung hi a thlak lem lo.

Premier League nomawi pathum leh FA Cup pasarih ngawt a chawi tawh hian North London club tana mibik a nihna a tarlang chiang viau.

Arsenal leh Arsene chanchin sawi apianga sawi hmaih ni ngai lo chu 'Invincibles' a ni. Hneh loh neih loa league nomawi an chawi season hi khawvelin a theihnghilh tawh dawn lo a, an sawi nawn leh ṭhin ang. Premier League Manager of the Season atana vawi thum thlan tawh Wenger-a hnathawh leh hlawhtlinna hi vawi khata ziah chhuah a, chipchiar taka tarlan vek sen a ni lo.

Mangṭha
April 20, Zirtawpni khan Arsene Wenger hian seaosn tawp rualin Arsenal enkawl hna a chawlhsan tur thu a sawi a, contract zah tak ni ṭhinin a contract neih lai a hmang zo lo tur hian khawvel a barakhaih hle.

Miṭhenkhat chuan Wenger hi amaha bang ni loin, ban a nih an rin thu an sawi a, hun rei tak chhung a hna ngai chelh tawh a nih avangin mawi hnai taka chhuahtir ni awmin an sawi. Mahse, hei chu a fiahna a awm lo a, rinthu mai a ni rih. Kum 68 mi Wenger hian, "Eng thutlukna pawh siam ila, Arsenal ṭhatna tur zel a ni ang," tiin a lo sawi tawh ṭhin tih erawh hriat tel a ṭha.

Mizo lengzem hla pakhatin 'Hlim te'n i len chuan, lawm zel ta nge' a tih ang khan, Arsene Wenger hian a hmangaih Arsenal enkawl zel ai chuan, hmalam pana an ṭhat tlanna tur zawk nia a hriat angin thutlukna a siam.

Wenger Thlahna Ṭhenkhat
" Pa fing leh fel, hun harsa ka tawh laia ka pa ang mai a ni. Mi dangin ka chunga rinna an nghah loh lai pawha min ring tlattu a ni. Boss, kawng engkimah ka lawm"
– Jack Wilshere

" Kan inkhelh dan a thlak danglam a, kan khawsak phung leh nun dan thlengin a thlak a ni. Tlarhnung remphui a thiamin, goal nawr turin a fing bawk"
– David Seaman

" Arsene ka chunga rinna i nghah ngam avangin ka lawm, mi bik leh coach ṭha chungchuang i ni a, khawvela a ṭha berte zinga mi i ni"
– Robin van Persie

" Ka beisei loh thil a ni, mahse a ropuina leh zahawmna a ti lang thung si. Min kaihhruaina, enkawlna leh thlawp tlatna te kha ka theihnghilh tawh ngai lo ang"
– Cesc Fabregas