Zanin dar 12:15-ah Europe club lian pahnih ; Bayern Munich vs Real Madrid

Allianz Arena-ah Bayern Munich-in zanin dar 12:15 hian Champions League semifinal first leg-ah Real Madrid an mikhual dawn. May 1 zanah Bavarians-in second leg khel turin Santiago Bernabeu an tlawh leh ang a, chumi zawh chuan Europe club pahniha final khel tur zawk chu a hriat ang.

Zinedine Zidane-a kaihhruaina hnuaiah Real-in kum hnih a zawnin Europe lallukhum an khum a, kuminah nomawi an chawi leh a nih chuan Champions League a nih hnua vawi thum a zawna champion thei hmasa ber an ni ang. Bayern Munich pawhin kum 2013-a Jupp Heynckes hoa treble champion an nih hnuah German pachal ho bawkin nomawi lian pathum chawi theih hun ṭha an nei ve bawk.

Bayern an mawm ṭha
Jupp Heynckes-a'n Italian manager Carlo Ancelotti aṭanga mawhphurhna a lak hnuah Bayern chu team ṭha zawkah a siam a, khawl nal ṭha tak ang zar zar an ni tawh.

Zanina inkhel bul ṭan tura beisei zingah Bayern player-te khelmuala hun hman zat chu 29,963 minutes a ni a, Real player-te hun hman zat 34,270 minutes nen an inthlau hle. Bavarians player zinga pathum chauhin tun season inelna hrang hrangah minute 3,000 an thleng pha a; keeper Sven Ulreich bakah Joshua Kimmich leh Robert Lewandowski ten khelmualah hun an hmang tam a, midang erawh an inthlak kual ṭha hle.

Kum 34 mi Arjen Robben leh kum 35 mi Franck Ribery te chu Bayern boss hian thiam takin a khelh chhawk tir a, kartawpa Hannover 3-0 a an hneh ṭum pawhin Real hmachhawn tur player-te chu hahdamna hun ṭha a pe bawk.

Hetihlai hian Real erawhin tun season-a minute 3,000 khel tling tawh player pariat zet an nei a, starting eleven-a chhawr tam zingah Luka Modric, Isco leh Karim Benzema te chiahin an thleng pha lo a, an khingpui tur Bayern aiin chawhrualin khelmualah hun an hmang tam zawk.

Amaherawhchu, Real hi kartawp khan an awl a, an match hnuhnung ber chu Ningani zan kha niin Athletic Bilbao nen 1-1 in an inhnehtawk a, siphurh sutna goal khungtu chu Ronaldo bawk a ni. Season pum thlirin German club aiin Los Blancos khel tam mah se match pawimawh bik hmaa chawlhna hun ṭha hian kawngro a su pha khawp ang.

German tan German
Carlo Ancelotti-a'n Bayern fachuam Thomas Muller chhawr ngaihna vak a hre lo a, German pachal Heynckes erawhin German forward chu bench mawitu aṭangin khelmuala player langsar berte zingah a pho chhuak.

Manuel Neuer-a awm loh laia captain armband hrengtu Muller hian match hnuhnung berah goal hmahruai a khung a, hemi hma chiaha German Cup semifinal-a Bayer Leverkusen 6-2 a an sawp ṭumin hattrick a siam bawk. Kum 28 mi Muller hian UCL-ah pawh goal thum a khung tawh a, league-ah goal riat khung tawh bawkin Real Madrid tlarhnung tan en liam chi a ni lo ang.

Bayern an ṭha

German keeper Sven Ulreich-a'n World Cup chawi tawh keeper Neuer awm loh chu hming chher nan a hmang a, tlarhnung laia ding Mats Hummels leh Jerome Boateng te ram tan thlenga inkawp an nih avangin an inhrechiang. Germany legend Philipp Lahm ang thoa thluak ṭha Joshua Kimmich an nei a, David Alaba ṭhat zia sawi nawn a ngai tawh lo bawk.

Tlarhnung leh tlarhma thlun zawm tura thiam dan inang lo tak Thiago Alcantara leh Javi Martinez te inkawp rem hi a mak lo a, Spanish player pahnih hi Bavarian midfield tichaktu an ni. Real Madrid-a beisei phak lo James Rodriguez-a'n a vanglai hun a hmang mek a, Colombian midfielder bika hriatthiam harsa chu season ṭha tak a hmang chungin tun season UCL match 10 a inlanah goal a la khung lo a, amah neitu laka khung a châk khawp ang.

Real tlarhnung su hawng turin Lewandowski leh Muller te an rinawm tawk a, Ribery leh Robben te inkarah tu zawk pawh lut se inthlahdah lo tur chi ve ve an ni a. Real defender Dani Carvajal pawhin Lewy, Ribery leh Robben te hmachhawn chu a huphurhawm thu a zep lo. Bayern hi kil tinah an ṭha a, Ancelotti hnuaiah bul ṭan ṭha tawk lo mah se Heynckes-a'n a enkawl meuh chuan April 7 khan FC Augsburg 4-1 a hnehin Bundesliga-ah an champion der tawh a ni.

Real an dang
Champions League-ah erawh Real Madrid an dang a, club dang chung ena awm tur pawhin player a nei ṭha thawkhat hle. Bayern innghahna zinga mi James meuh pawhin Real-a khelhna hmun a chang pha lo hian an ṭhat zia chu a sawifiah. Los Blancos hian vawi 12 an champion tawh a, vawi nga nomawi chawi tawh Bayern nen an inkarah vawi sarih champion tawh Milan chiah an tla zep.

Real innghahna Ronaldo chuan Bayern a hmachhawn hnuhnung pathumah goal sarih a khung a, vawi ruk a hmachhawn tawhah goal kua a khung. Bayern forward Lewandowski chuan, "Kuminah chuan an pet goal tawh lo ngei ka beisei a, chutihrualin Real hi Ronaldo chauh a ni lo," tiin team pumpuia an ṭhat thu a sawi.

Polish striker Lewy sawi ang hian Real hian a hun laia khawvel player manto ber ni pha Gareth Bale pawh bench-ah an dah thei a, kum 32 mi Luka Modric leh a bul vela awm Isco, Toni Kroos leh Casemiro te chu a mal ṭheuha an chanchin sawi zau tlak vek. Bayern-in UCL nomawi an chawi hnuhnung ber khan Kroos hi player pawimawh a ni a, Los Blancos hian German duhlai hi an chhuhsak thei a ni.

Real tana thu lawmawm chu Sergio Ramos rawn let tur hi a ni a, Spanish defender hi quarterfinal second leg-ah inlan thei loin Zidane-a hote an talbuai phah a, kum 32 mi defender a awm chuan Los Blancos tlarhnung pawh a dang khawp ang.

Ronaldo vs Lewandowski
Bayern Munich manager Jupp Heynckes chuan, a striker neih hriam ber Robert Lewandowski leh Real Madrid forward Cristiano Ronaldo te chu an inkhelh dan hmang a inan chiah loh avangin khaikhin chi an ni lo ti mah se, German club leh Spanish club tana goal khung khawl ve ve an nih avangin khaikhin a ṭul miau si.

Ronaldo a chungnung
Real Madrid forward Ronaldo hi feet ruk leh inches hniha sang a ni a, tun season UCL-ah a khel tluan vek a (minute 900), goal 15 a khung tawh a, minute 60 danah goal a khung.

Ronaldo goal 15 zinga goal 10 hi a ke dinglama a khung a ni a, vawi thum hi ke vei lam niin vawi hnih dang hi a lu hmangin a khung. Portuguese forward hi tlan chak lai berin tun season bikah 31km/h in a tlan a, a ke pahnih leh a lu a hman thiam bawk avangin dan harsa tur a ni.

Kum 33 mi ni tawh mah se Ronaldo hian midang chunga len châkna a la nei lian a, goal khung tur hian target-ah vawi 32 a pet a, target loa kal vawi 28 a awm a, vawi 12 an dan sak a, tehna hrang hrangah hian record a ni vek.

Lewandowski hi Portuguese forward aiin kum thumin a naupang a, centimetre khat leka hniam zawkin tun season-ah minute 775 a inlan tawh a, goal nga a khung tawh a, minute 155 dana goal khung ang a ni. Polish striker Lewandowski hian tun season-ah a lu hmangin goal a la khung lo a, a ke dinglamin goal thum khung tawhin a ke vei lamin goal hnih a khung. Goal attempt vawi 36 a nei a, chung zinga vawi 7.20 chu goal-ah chantir a, Ronaldo aiin score rate (4.33) a nei ṭha lo zawk.

Bayern striker hian tun season UCL statistics thlirin Ronaldo tluk lo deuh mah se dem theih a ni lo, Lionel Messi meuh pawhin Champions League bikah chuan Portugal captain hi a tluk lo.

Lewy chan ṭhatna
UCL lama inel tur an ni nachungin tun season league lama an khelhna thlir let a ṭul a, mahni ram league-ah erawh Lewandowski-a'n goal a khung hnem zawk. Bayern striker hian goal 28 khungin Bundesliga-ah a champion pui tawh a, minute 2002 inlanin minute 72 danah goal a khung. Ronaldo erawhin league-ah goal 24 khungin champion a beiseiawm tawh lo a, minute 2185 inlan tawhin minute 91 danah goal a khung.
Lewy hi league-a amah hnaih bertu Hoffenheim forward Mark Uth-a'n goal 14 zetin a pha lo a, Ronaldo erawhin La Liga-ah goal ngain Messi a pha lo.

Chungnung zawk an awm lo
Europe khawlmualpui inelnaa club intawng ngun ber chu Bayern Munich leh Real Madrid te hi an ni a, tun ṭum hi an vawi 25 inhmachhawnna tur niin vawi 24 an inkhelh tawhah vawi 11 ve ve an chak a, vawi hnih an inhnehtawk.

An intawn hnuhnun ber chu nikum quarterfinal kha a ni a, minute 180 chhungin chak zawk an awm lo a, extra time khelh a nih hnuah 6-3 in Real an chak zawk. Ronaldo chuan an mual leh khualmualah goal a khung ve ve a, second leg-ah hattrick a siam.

Kum 2014 khan semifinal-ah tho an intawng a, Pep Guardiola kaihhruai Bayern chu first leg-a 1-0 a an tlawm hnuah Allianz Arena-ah 4-0 in an chak lo leh a, German club an mualpho hle. Amaherawhchu, Bayern inchhuahna tur chu tun ṭuma manager Jupp Heynckes-a kaihhruaina hnuaiah kum 2012 khan Bavarians hian semifinal-ah Real hi an hneh a, an champion zui bawk.

Hemi ṭum hian an mualah 2-1 ve vein an chak a, extra time khelh a nih hnuah chak zawk an awm loh hnuin penalty shootout-ah 3-1 in Bavarians-in hnehna an chang. Los Blancos lamah Ronaldo, Kaka leh Ramos te penalty an hlah a, Bavarians lamah Kroos leh Lahm ten an hlah ve bawk. Penalty pet goal lo zinga player pathum hi tun ṭuma Real aiawha inlan tur an ni.