Goal khung châk City keeper Ederson

Manchester City keeper Ederson chuan Premier League champion zinga goal khunga hmasa ber nih a châk thu a sawi. Brazilian keeper hian nikum transfer lai khan Benfica aṭangin pound maktaduai 35-in City hi a zawm a, season khatnaah a che ṭha nghal hle.

Kum 24 mi keeper chuan, "Pep hian pet tura min tih chuan ka pet mai ang. Keeper ni chunga pet goal ve theih hi a châkawm. Penalty pet chu a na emaw a dah a dah ang zawng pawhin ka thiam ve ve a, amaherawhchu City-ah penalty pet thiam an tam avangin ka pet pha ang em tih erawh ka hre lo," tiin a sawi.

Ederson hian City tan league match 34 a inlan tawhah clean sheet vawi 15 a nei a, vawi 759 zet a teammate-te ball pass in, chung zinga 85% chu a dik a, ball a pet a thiam tih chu a khelh danah a lang.

City hian match li khelh hmabaka an la nei a, an match hnuhnung bera Swansea an hneh ṭumin penalty an hmu a, pet tura ding chhuak Gabriel Jesus chuan a pet goal lo a, penalty an hmu leh hlauh a nih chuan a thusawi vang hian manager Pep Guardiola-a duhsakna a dawng lo ang tih a sawi theih loh.

Premier League-ah hian keeper panga Peter Schmeichel, Brad Friedel, Paul Robinson, Tim Howard leh Asmir Begovic ten goal an khung tawh a, tun season-a goalkeeper zinga pass hnem ber leh pass dik tam ber ni mah se goal khung tur chuan vanneihna a mamawh a ang.

Brazilian keeper chuan, "Penalty kan hmuh khan supporter-te khan ka hming an lam a, Gabriel khan a pet ta zawk. Manager-in pet tura min tih phawt chuan ka pet goal ang," tiin a inringtawk hle. Ederson hi Benfica youth team tana a khelh lai pawhin midfield-ah khelhtir a lo ni tawh ṭhin a, City tana midfield-a khelh a ngam thu pawh a lo sawi tawh a ni.