Everton tan Walcott goal a tawk

Thawhṭanni zan khan Pre­mier League inkhel pakhat a awm a, second half-a Theo Wal­cott goal khat hmangin Everton chuan an mikhual Newcastle United 1-0 in an hneh a, phurrit hnuaia awm mek Sam Allardyce tan chanchin lawmawm a ni.

Goodison Park-a inkhelah tun hnaia harhtharna chang New­castle United an ṭang rei thei viau a, mahse minute 51-naah Walcott an veng zo lo zeuh. England international hian Janaury thla hnua a goal hmasa ber a khung a, a club thar Everton tana a goal thumna a ni chiah bawk.

A tawk lo
Allardyce-a nauten match 35 khelh aṭanga point 45 hmuin table-ah pariatnaah an invawrh chho a, an dinhmun a him tawk tawh hle. Amaherawhchu, European football khelh beisei ve phaka inngai an nih avangin an dinhmunah Everton fans lawm a kim lo.

Tun thlatir khan Everton hi Swansea City nen 1-1 in an in­hneh­tawk a, fans ṭhenkhat chuan an manager hi ban tawh mai an duh. Toffees hian tun hnai an match hnuhnung pathumah goal hnih chiah an khung a, attacking football hmuh duh club tan tuna an khelh dan hi lawmna chi chu a ni lo.

Newcastle lakah pawh in­khel thunun viau mah se first half chhungin an khingpui goal zawnah an pet miah lo a, Walcott-a'n a khung zauh tih bak chu second half-ah pawh goal hlauhawm dang an nei chhunzawm thei chuang lo a ni.

Insawifiahna
Sawisel tawk nasa hle mah se Everton manager Sam Allardyce ngaihdan erawh a la ngai reng. Allardyce chuan, "A tawp lam minute 10 chhung tih loh kha chu inkhel kan thunun hneh viau a, kan khelh danah khan dik lo a awm ka hre lo," tiin a naute a khelh tir dan thlak a la tum lo hle.

Engalnd manager hlui Allardyce chuan sawi zawmin, "Hnehna kan chang a, a chung lamah kan invawrh chho zel bawk, kawng dik kan zawh mek a ni. Hmalam panin kan kal zel ang," tiin a sawi.

Toffees midfielder hlui Leon Osman chuan, "Hnehna an chang a, mahse inkhel hmunawm a ni lo," tiin a club hlui khelh dan a sawisel a, an manager chu inkhel hmuhnawm lantir tura thluak hmang tawk loah a puh bawk.

Match 100
Rafael Benitez-a'n New­castle United chu match 100 a enkawl tling ta chiah a, mellung pawimawh a phun niah hnehna chang zo lo mah se a naute khelh danah a lawm thu a sawi.

Benitez chuan, "Kan ball inpek kual vel pawh a dikin kan thawkrim hle bawk. Mahse, kan khingpuite goal bul hnaia kan in pe fuh thei lo khan danglamna a siam thei lo a ni. Kan tum ber chu Premier League khelh chhunzawm a ni a, kan him ngei pawh ka beisei," a ti.

League table-a 10-na ni lai Newcastle hian point 41 an hmu tawh a, league match khelh tur pali an la neih aṭangin point khat an hmuh belh a nih chuan an him chiang tawh a, kai thar team hian point an hmuh belh lo a nih pawhin an hnuaia mite result avangin an him thei tawh tho bawk.