Daredevils an hrang thei lo

Delhi Daredevils an vanduai a, Kings XI Punjab lakah run li lekin an tlawm. Bowler lansarhna inkhelah Delhi tan Liam Plunkett chuan wicket thum ngawt la mah se a team erawh hnehna a chanpui zo chuang lo.

Delhi khawpuia inkhelah Kings XI Punjab an bat hmasa zawk a, over 20-ah run 143 lek siamin wicket riat an hloh - run siam hnem ber Karun Nair pawhin run 34 bak a tlin thei lo.

Mualneitu team tan hian fast bowler Plunkett chuan over li lek a vawmah run 17 chiah a pe a, wicket thum a la. Avesh Khan leh Trent Boult ten wicket hnih ve ve la bawkin Punjab batsman an zawr a, Delhi tan hna a awlsam sawt tura ngaih a ni.

Mahse, Delhi-in eng ruai an ang bik lo. Run 57 siamtu Shreyas Iyer rawn ṭang thei viau mah se Kings XI bowler ho inlar hun a thleng ve thung a, Ankit Rajpoot, Andrew Tye leh Mujeeb Zadran ten wicket hnih ṭheuh an rawn la ve leh a, Delhi batsman dang zingah Iyer anga ṭang thei an awm lo.

Daredevils hian over 20-ah run 139 chiah an siam a, wicket riat tho hloh bawkin run liin an tlawm ta a ni.