Arsenal Mualah Atletico Madrid

Arsene Wenger enkawlna hnuaia an match pawimawh berte zinga ngaih Arsenal-in an khel dawn. Europa League semifinal khel turin zanin dar 12:35 hian Emirates Stadium-ah Atletico Madrid an mikhual ang. Semifinal first leg inkhel dangah Marseille leh RB Salzburg an inkhel dawn bawk a, April 26-ah second leg khelh tur a ni.

Arsenal manager Wenger chuan, "Nomawi chawi tur chuan semifinal paltlang phawt a ngai," tiin a sawi tawh. He thu hian awmzia thui tak a nei; Diego Simeone-a naute nen chungnung zawk nih an inchuh tur hi final aiin a hautak zawk dawn tih a hriat theih a ni.

Laipui
Arsene Wenger-a'n season tir lamah Europa League ngai pawimawh tawk lo mah se, tunah chuan a ngaihdan a dang tawh. Kar tawpa West Ham nen Premier League an khelh chu inenchhin nan a hmang a, 4-1 in hnehna an chang.

Hammers an hneh hnuah Wenger-a'n an chet dan vanga a lawm thu a sawi. Mahse, London derby-a danglamna siamtu Pierre-Emerick Aubameyang leh hliam tawk Mohamed Elneny an inlan thei dawn lo. Chutihrualin damlohna vanga inlan lo Mesut Ozil leh Jack Wilshere te erawh Atletico hmachawn turin an rawn kir ang.

Real Madrid midfielder hlui Ozil-a'n tun hma lamin Atletico Madrid lakah goal nga a khung tawh a, hliam vanga defender Juanfran chhawr thei lo tur Atletico tan Germany international hi ven tham a tling dawn.

Ozil bakah hian goal li khung tawh Aaron Ramsey an nei bawk. Welsh international Ramsey-a'n CSKA Moscow an hneh ṭumin goal mawi a khung a, Gunners tana tun season Europa League top scorer hian West Ham lakah goal mawi dang a khung leh tawh bawk.

Wenger-a nauten an ball thiamna hmangin midfield thunun an tum dawn a, Ozil leh Ramsey ten an hna an tlin a nih chuan Alexandre Lacazette leh Henrikh Mkhitaryan te tan, season kal laia La Liga goal chhuah tlem ber (18 goals) Atletico bangpui su hawng turin kawng an sial sak thei ang. Second leg hi khualmuala an khelh dawn avangin final lut tur chuan zanina goal khung ngei a pawimawh dawn hle.

Bangpui
Diego Simeone kaihhruaina hnuaiah Atletico Madrid hi team hlauhawm leh nghet tak an ni mek a, Barcelona leh Real Madrid te vanglaia La Liga champion thei hian 2010 leh 2012 khan Europa League nomawi an chawi a, an khingpui tur Arsenal aiin sulhnu an nei ṭha zawk.

Argentine manager hian Champions League final-ah a naute vawi hnih a inlan pui tawh bawk, mahse an la champion lo thung. Simeone hian, "UCL final-a chak loh ai chuan Europa League champion nih ka duh zawk," tiin a sawi tawh a, semifinal-a tawp an tum lo.

Atletico-in an match hnuhnung bera Real Betis an hmachhawn ṭumin Diego Costa chu malpui hliam vangin a inlan lo a, Chelsea striker hlui hi Gunners hmachhawn turin a tlangnel tawhna hmun London lamah a thlawk lut. Betis lakah Koke, Diego Godin leh Antoine Griezmann te hahchawlhna hun pek an ni a, zaninah a tir aṭangin an lut thung ang.

La Liga pahnihna hi an goal khung hnem aiin ven thiam an larpui a, chutih rualin tlarhma lama Griezmann hnathawh erawh sawi hmaih theih a ni lo ang. France forward hian season tir lamah match 30 aṭangin goal 11 chauh khung mah se, tun hnai match 20 aṭangin goal 18 a khung leh tawh a, league goal 46 chhuah tawh Gunners tlarhnung su hawng turin a tling tawk.

Spanish team hian Emirates Stadium-ah fing takin an mahni goal an veng leh dawn, an tih ṭhin danin counter attack aṭangin Wenger-a team an bei leh ngeiin a rinawm. Wanda Metropolitano-a inkhel leh tur an nih avangin goal lut loa an inhnehtawk a nih pawhin a lawm zawk an ni ang.