Youth Olympic beisei Jeremy leh Jacob

Asian Youth Olympic Qualification Championship neih mekah, Mizo weightlifter Jeremy Lalrinnunga chuan youth huangah silver lain, junior inelna lamah bronze medal a la bawk. Jacob Vanlaltluanga pawhin bronze lain Youth Olympic Games-a inlan turin a dinhmun a siamṭha bawk.

Urgench, Uzbekistan-ah inelna neih niin, Thawhlehni zan khan Jeremy hi 56kg category-ah a inlan. Govt. Complex rawlthar hian silver medal la tur hian snatch 114kg leh clean & Jerk 136kg chawiin, a chawi zat total chu 250kg a ni. Commonwealth Games neih zawh taka senior huangah India tana silver latu Gururaja Poojary aiin kg khatin a chawi rit zawk, Gururaja nen hian an khelhna category an inang chiah.

Inelna hi May 30 thleng neih a ni dawn a, Youth Olympic a kal tur puan nghal ni rih lo mah se Jeremy hi tling chiang ngei tura ngaih a ni. Tun hma chuan a sang panga chinin Olympic an khel thei ṭhin. Jeremy hian pakhatna Vietnam aiawhtu Ngo Son Dinh chu kg8 in an phak lo a ni.

Youth World Weightlifting Champinship-a silver medal dawng tawh Jeremy chuan, "Ka taksa rihna ka tihniam a, ka beisei ang takin ka che ṭha tawk lo. Ka taksa a chau hle a, chutihrualin Pathian min hruaina ka thlen chinah hian ka lawm," tiin Vanglaini a hrilh.

Mizo naupang dang Jacob Vanlaltluanga pawhin nimin khan inelna a hmachhawn ve leh a, 62kg huangah a inlan Jacob-a hian snatch 108kg, clean & jerk 131, a vaiin 239kg chawin bronze medal a la ve bawk a ni - ani pawh hi Youth Olympic-ah India tan a inlan ang.

SYS coach Malsawma Khiangte kaihhruaina hnuaia bul ṭan, Jeremy hian Asian Games Qualifier khel turin India camp a zawm lehnghal dawn. Asian Games hi August 20-27 chhunga neih tur niin, Youth Olympic Games hi October 6-13 hian Argentina khawpui Buenos Aires-ah neih a ni ang.