Mini Volleyball Championship-ah Mizoramin knockout round lut

26th National Mini Volleyball Championship 2018 khelh mekah Mizoram hmeichhe team chuan knockout round an lut. Mizoram hian match thum khel tawhin Karnataka, Maharashtra leh Bihar te chu straight set vekin an hneh.

Volleyball Association of India hnuaia inelna chu Mizoram Volleyball Association chuan a vawi khat nan a thleng a, inelna hi April 24 aṭangin R. Dengṭhuama Hall, Mualpuiah neih ṭan a ni a. Mizoram hian knockout stage lut turin nimin khan Bihar chu 25-8, 25-17, 25-9 in an sawp.

Mizoram hmeichhe team hi Group C-ah Kerala, Maharashtra, Karnataka leh Bihar te nen an awm khawm a, an khingpui an hneh vek avangin match khat khelh hmabak nei chungin group stage an paltlang dawn tih a chiang tawh. Match hnuhnung ber hi Kerala nen vawiin hian an khel ang.

Mipa team lam pawhin result ṭha an nei a. Inelna neih ṭan niin Jammu & Kashmir an hneh a, match hnihnaah Karnataka an hneh leh bawk. Nizan khan mipa team hian Uttar Pradesh an hmachhawn a, result kan hre hman lo. Vawiin hian Haryana nen group match hnuhnung ber an khel ang.

Mizoram Volleyball Association chuan Mizoram team ṭawiawm tur leh, India rama tleirawl leh rawlthar volleyball thiam rualte inkhel en turin mipuite an sawm a ni.