FA Cup final khelh hun a hriat

2018 FA Cup final chu May 19 zan dar 9:45-ah Chelsea leh Manchester United ten Wembley Stadium-ah an khel dawn.

Vawi sarih champion tawh Chelsea hian nikum final-ah Arsenal 2-1 in an hneh lo a, kum zawna final lut turin Pathianni khan Southampton 2-0 in an hneh a, Olivier Giroud leh Alvaro Morata ten goal an khung.

Manchester United hian FA Cup nomawi vawi 12 an chawi tawh a, Inrinni khan Tottenham 2-1 in an hneh a, tun ṭum hi final vawi 20 an thlenna niin Arsenal nen final thleng ngun ber an ni.

Blues leh United te hi kum 2007 khan an intawng tawh a, tun ṭuma United manager Jose Mourinho chuan Chelsea enkawlin 1-0 in hnehna a chan pui a, he inkhelah hian extra time khelh niin Wembley sak ṭhat a nih hnua final-a extra time khelh hmasak ber ṭum a ni. Kum 1994 khan team pahnih hi final-ah an intawng tawh a, United hian 4-0 in hnehna an chang.

Wembley Stadium-ah hian mi 90,000 an leng a, team pahnih te hian an supporter-te tan ticket 28,000 an chang ang. Michael Olivier chu final-a referee tur a ni a, Football Association chuan a vawi khat nan final-ah video assistant referee (VAR) an hmang dawn a, Neil Swarbrick chu mawhphurhna chelhtu tur a ni ang.