Sharapova a dingnghet thei lo

Maria Sharapova chu Stutt­gart Grand Prix-a a match hma­sa berah Caroline Garcia hneh loin a tla nghal a, tun hnaiah a zawnin match li a tlawm ta - tennis a khelh hun chhunga a chetchhiat ber ṭum a tawng mek.

Thawhlehni zan inkhelah Sharapova hian harsa lutuk loin set hmasa ber la mah se, seeded parukna Garcia-i'n 3-6, 7-6 (8/6), 6-4 in a hneh let. Grand Slam vawi nga champion tawh Sharapova-i'n set khatna bikah unforced errors vawi hnih chiah neiin bul ṭan fuh hle mah se a hnu lamah beisei a phak lo, tihsual a ngahin a ball vuak a na tawk lo bawk.

Garcia hian tun hma lamin Sharapova lakah hian hnehna a la chang ngai lo, an intawn hnuhnung ber chu kum thum liam ta daih tawh kha a ni thung. Set hnihna an khelh laiin Garcia hi 4-2 zetin a hnufual hman - ṭum dang ang bawkin a tlawm dawn niin a lang hman.

Amaherawhchu, Shara­pova-i service chhuhsakin 4-5 a nih chhohpui a, tie break an khelh hnuah a vannei zawkah ṭangin set hnuhnung berah buaina a tawk zui lem lo. France nula Garcia hian last 16-ah chuan Marta Kostyuk a hmachhawn leh ang. Inkhel dangah Ukrainian nula hian 6-4, 6-1 in Antonia Lottner chu a lo hneh ve bawk a ni.

Sharapova a chuai
World number 1 hlui Sha­ra­pova hi damdawi hman phal loh a hman avangin thla 15 chhung hrem a ni tawh a, hremna a hman zawh hnuah tun hma lama a theihna sang tak ang kha a la lanchhuahtir leh lo a ni.

Kumina Grand Slam hmasa ber Australian Open-ah khan second round a paltlang a, third round-ah Angelique Kerber a ngam lo. Kuminah Tatjana Maria leh Anastasija Sevastova te a hneh bak chu chak ni hmel a la hmu leh lo.

Qatar Open leh Indian Wells-ah te inlan ve mah se Monica Niculescu leh Naomi Osaka te a hneh lo. Tun din­hmunah Sharapova hi world number 41 a ni mek a, ranking chhuak tharah chuan a sang 50 zingah a tel phak dawn lo. Tennis khel thiam leh huaisen bik a nihna ang kha ti lang leh tur chuan a insiamṭhat ran a ngai tawh ang.