Aw Salah, tu nge i ropuina hril zo ang?

Football khawvelin Mohamed Salah ropuina an in hril siak a, duhtawk chin an nei thei lo. Thawhlehni zan khan Liverpool chuan Champions League semifinal first leg-ah AS Roma 5-2 in an sawp a, Salah chuan a club hlui lamah goal hnih khungin assist vawi hnih a nei bawk.

Liverpool tan Salah bakah Roberto Firmino chuan goal hnih khungin assist vawi hnih a nei ve bawk a, Sadio Mane-a'n goal khat a khung bawk. The Fab Four tia hminglem an pek aṭanga Philippe Coutinho a vah bo hnuah pawh Liverpool tlarhma hmuhnawmna a la danglam lo.

Team pahnihin Rome khawpuiah second leg an la khel leh dawn a, an inkhelhna tur hmun Stadio Olimpico hi 3-0 a Barcelona an tlawmna kha a ni–he result hretu tan Liverpool-in Champions League final an lut chiang tawh anga sawi chu thil ngam awm a ni chuang lo.

Hriat tel atana ṭha erawh hei hi a ni, Liverpool-in Rome khawpuiah Champions League nomawi vawi hnih an lo chawi tawh.

Reds aiah Roma
Anfield-a inkhelah Roma-in bul an ṭan ṭha zawk a, inkhel ṭantir lam minute 20 chhung chu Mohamed Salah aiin Dejan Lovren leh Virgil van Dijk te an lang ngun zawk. Italian club hian an hman thiam ṭhang full back pahnih hmangin an nawr a, a hlauhawm ṭhin hle.

Roma tan Aleksandar Kolarov-a'n 0-0 a nih laiin yard 20 vel aṭangin a kawh zetin a pet a, Reds keeper Loris Karius chuan bar nam per nan a lo hmang. Roma-in Liverpool thiam danin a tir lamah an khel a, ball an hloh hlekin Reds player an hnaih chilh zung zung a, Liverpool player an che hman meuh lo.

Anfield-ah Jurgen Klopp-a nauten insiamṭha tur erawhin hun an mamawh tam lo, minute 20 tir lam Roma ta ni mah se 'heavy metal football' an rawn pholang ṭan a, Roma player an chesual tam tawlh tawlh a, Liverpool-in chance an ngah tulh tulh thung.

Sadio Mane leh Salah tlan chakna, Firmino ball thiamna leh midfield 'thawhrimna' hmangin Liverpool-in Roma an nawr let thut thut a, Roma player-ten tihngaihna an hre ṭhin lo a ni ber–Mane-a'n a tlan chakna hmanga ball a luhpui hnuah a pet over a, Firmino pass chu hnai set sawt aṭangin a hlah bawk.

The Fab Three?
Minute 35-na a ni a, Liverpool-in goal an khung ta nge nge. Alisson-a'n Salah-a shot hmasa ber ṭha zetin dan sak mah se a vawi hnihna erawh a dang tawh lo. Jordan Henderson-a'n Edin Dzeko ball a chhuhsak hnuah Mane leh Firmino ten ball an inpe kual a, a tawpa changtu Salah-a'n goal chung kil sirah mawi zetin a pet lut.

Salah-a'n a la duhtawk mai lo. Minute 45-naah Firmino nen bawk ball an inpe kual a, Liverpool nena sawi zawm Alisson hmaah confi zetin ball a lalut a, a 'chip' khum. Roma fan-ten nipui laia pound maktaduai 34-a an hralh tak player hrilhhai takin an thlir a, Salah-a'n a club hlui zahna lantir nan a goal khung a lawm duh lo thung.

Liverpool-in goal hnih khung tawh mah se second half-ah pawh an la duhtawk lo. Minute 56-naah Salah thiam zia a lang nawn a, Egyptian forward hian duh ni se a hattrick siamna turin goal-ah a 'pet' thei–mah se duhsak takin Mane a pe a, Senegalese forward a vanduai reng bik tawh lo.

Minute nga a liam a, Firmino hun a inher chhuak–Salah siamsak bawk chu awlsam takin a pet lut a, minute 68-naah James Milner-a corner a tauh lut bawk–Milner tan tun season Champions League-a assist vawi kuana a ni a, Europe-a club inelna sang berah season khata heti zat assist nei thei an la awm ngai lo.

Beisei nei Roma
Hun tawp nan minute 15-a la awm a, Reds-in 5-0 in hma an hruai. Ngaihngam tawh Jurgen Klopp-a'n Salah a la chhuak a, standing ovation nena thlah liam forward aiah hian Danny Ings a lut.

Mahse, beiseina chuai tawh nia ngaih Roma tan Salah chhuak hi 'beiseina' siamtu a ni a, tlarhnunga Salah veng reng renga talbuai defender an tlan chhuak tam sawt a, an goal nawr a nat sawt avangin inkhel dang daih a ni.

Minute 80 chhung hmuh tur awm lo Radja Nainggolan a rawn lang a, Dzeko tana a siam sak chu Manchester City striker hlui hian goal-ah a chantir. Roma tan mualpho zualpui khuhna tur goal mai anga ngaih a nih laiin phurna petu goal a ni a, Nainggolan a che ṭha chhunzawm a.

Manchester United nena sawi zawm midfielder ball pet chuan Milner-a kut a per. Penalty pek an ni a, Diego Perotti chuan chiang zetin a pet lut. Liverpool an ṭang tluan hram a, si thuma dinhmun ṭha zawk chungin Rome an pan leh ang.