Aizawl FC-in point an hlawh chhuak ve ta

26th April, 2018

Asia khawmualpui club-te tana inelna sang ber dawttu AFC Cup-ah nimin khan Aizawl FC chuan Bangladesh club ṭha Abahani Limited Dhaka chu an mual Bangabandhu National Stadium-ah lenchilhin 1-1 in an inhnehtawk.

Inkhel dangah New Radiant-in Indian Super Cup champion Bengaluru FC 2-0 in an hneh a, Maldives club hian Indian club hi Bangalore-ah 1-0 in hneh lo mah se an mualah 2-0 a hnehna an chan avangin head to head-ah an ṭha zawk a, pakhatna dinhmun an hauh.

Team pakhat chiahin stage sang zawk an inhlankai dawn avangin match hnih khelh hmabaka dinmun ṭha ber chu Maldives club New Radiant an ni.

Point hlu tak chu
Aizawl FC-in a vawi khat nan Asia ram khawmualpui inelna an hmachhawn a, match hmasa pathumah an chak lo vek. Nimin tlai khan Aizawl FC hian Guwahati-a 3-0 a an hneh tawh loh Dhaka Abahani an hmachhawn a, khualmuala khel an nih bawk avangin hmabak a khirh tih hriat sa a ni.

Harsatna belhchhah turin darkar chanve lekah Emeka Onuoha-a'n Aizawl FC left back Lalramhmunmawia laka a penalty hlawhchhuah chu goal-ah a chantir a, 1-0 a ni nghal. Mizo club tan hmabak a ko a, Alfred Kemah Jaryan-a'n box pawn aṭangin a pet a, goal pawnah chiah a kal.

Second half-ah Abahani Limited Dhaka lamin chance nei hmasa mah se Romanian midfielder Andrei Inonescu-a'n a theihna sanzia a pholang a, minute 65-naah siphurh sutna goal a khung.

Mizo club an ṭang tlang a, Bangladesh-ah point hlu tak an hlawh chhuak. Aizawl FC tan stage sang zawk thlen a beiseiawm tawh lo a, amaherawhchu point khat hian an mualpho tur a hliahkhuh ang.

Bengaluru an chak lo
Nikuma Federation Cup champion Bengaluru FC-in Indian Super Cup hmasa ber chawi thei mah se AFC Cup-ah an result ṭha an chhunzawm thei lo a, Maldives-ah an tlawm.

First half inhnehtawk takah minute 29-naa Ali Fasir-a goal chu New Radiant chungnungna a ni a, second half ṭan chiahah Ashfaq Ali-a'n goal hnihna a khung belh leh bawk avangin Indian club tan thawhchhuah a harsa. Hun tawp thlengin Bengaluru FC-in nawr mah se goal an hlawh chhuak lo a, 2-0 in an chak lo.