Myanmar kal tur Leeds an sawisel
Championship club Leeds United chuan Myanmar-ah pre-season tour nei turin ruahmanna an siam a, hei hi Britain sports minister Dr Rosena Allin-Khan chuan na taka sawiselin, "Leed hi an kal lui a nih chuan an rilru a kalsual tawh tihna a ni ang," a ti.
Leeds United hian May 9 leh 11 khian Myanmar hi tlawh an tum a, ruahman anga engkim a kaltluang a nih chuan Myanmar National League All-Star team nen an inkhel hmasa phawt ang a, Mandalay khawpuiah Myanmar National Team nen an inkhel leh bawk ang. Myanmar senior team-ah hian Mizo tlangval Vanlalhruaia chu si ban nghak a ni.
English Premier League-ah pawh club langsar pawl ni ṭhin Leeds neitupa Andrea Radrizzani hian Myanmar bawr velah sports media firm hmanga sumdawnna zauh a tum a, hei hi Myanmar-a pre season tour neih an tum chhan a ni.
Dr Allin-Khan chuan, "Leeds hian an ngaihtuahna an seng ṭha tur a ni. Nakin zelah thawnthu hlui keu let a nih apiangin Leeds chanchin hi a ṭha lo zawngin hriat reng a ni tawh dawn a ni. Mipui sang tam tak tualthihnaa mawhphurtu sorkar awpna rama football club kal chu a dik thei lo a ni," a ti.
Myanmar sorkar hi Rohingya Muslim te chunga a chet dan avangin khawvel ram hrang hrang ten an dem rawn a, nikum August khan Rohingya helten Myanmar police post an beih vangin Myanmar sipai chuan Rohingya ho chenna, Rakhine state-ah nasa takin beihpui an thlak.
Sorkar hrang hrang demna karah Myanmar sorkar chuan hel chauh an bitum thu sawi mah se mi tam takin nunna chanin chenna in leh lo tlanchhiatsana raltlan tam tak an awm phah a, khawvel mithmuha hmingṭha lo tak rama English club an zin tur hi Dr Allin-Khan chuan a duh lo a ni.