Murray-a'n nghak rih dawn

Andy Murray chuan duhthusama a dam hma chuan inkhelh a hmanhmawh lo. Karleh hian Glasgow-ah inlan tum mah se a chawlh rih leh zawk tur thu a sawi.

Pathianni aṭangin Scots­toun, Glasgow-ah ATP Challenger khelh tur a ni a, Britain tlangval Murray a la inlan dawn lo. May thlaa khelh tur Libema Open-ah chuan inkhel thei tawh tura beisei a ni.

Grand Slam vawi thum champion tawh Murray hi season hmasa chawhnu lam aṭang khan a la inkhel mumal leh lo. A khel bawr na vangin kuminah pawh a la inlan hleithei lo bawk. French Open khel turin tling mah se tun dinhmunah chuan a inlan theih dawn leh dawn loh a chiang ta rih lo.

Kum 30 mi Murray hian tun hma lama a hlawh­tlin tam lohna clay court season hman ai chuan, muangchanga grass court khelh mai a duh thu a lo sawi tawh bawk. Vawi hnih a champion tawhna Wimbledon-ah chuan inlan hman ngei tura ngaih a ni.