FIFA a insingsa mek Club World Cup leh Nations League thar

Football khawvela thuneitu sang ber FIFA chuan tun hnai khan football khawvel kal zel dan tur chungchangah intawh khawm pawimawh tak an nei a, heng zingah hian Club World Cup siam danglam leh Nations League chungchang a tel.

Tuna ruahmanna ang chuan inelna pahniha sum chevel ringawt tur hi pound tluklehdingawn 17.9 a ni dawn a, hemi chungchangin ngaihven a hlawh dan a zir leh hmalak zel dan a zirin FIFA chuan a council member-te chu May thla laihawl khian Zurich khawpuiah titi puina a nei ang.

Europe club lian zawkte chuan tun hnaiah khan match tlem zawk khela player-ten chawlh tam zawk nei thei se an duh thu an lo sawi tawh a, FIFA chuan European club liante beiseina hi an tih hlawhtlin theih ngei an beisei thu an sawi.

FIFA thuneitu, a hming tarlan loh chuan, "Kan ruahmanna hi kan vaiin kan pawm dawn lo tih kan hria a, mahse sawihona neih hrim hrim kan duh. Sum chevel pawh rual khai taka sem a ni dawn a ni," a ti.

World Cup = 48 teams
FIFA chuan nikum khan kum 2026 World Cup aṭanga team 48 awm turin an pawm tawh a, tuna ruahmanna thar an neihah chuan 2022 aṭanga team 48 tel tir ṭan hi a ni. Kumin World Cup hma hian Moscow khawpuiah FIFA congress neih a ni dawn a, hetah hian FIFA chuan member-te ngaihdan a la ang.

Team 48 tel hi pawm a nih chuan 2022 World Cup thlengtu tur Qatar tan team 16 neih belh tur avanga game tam belh leh thil dang tam tak a ken tel turte chu 'dawl' theih a ni ang em? tih chu zirchianna neih leh tur a ni.

Club World Cup thar
Club World Cup neih mek hi December apiangin team pasarih inelna atan neih ṭhin a ni. FIFA chuan team 24 telna tura tih len an duh a, kum li danah khelin June-a khelh ni se an ti bawk.

• Team 24 chu group pariatah ṭhen niin group khatah team pathum zel an awm ang.

• Group hruaitu ṭheuhin knockout round an lut ang a, finalist chuan a tlem berah match nga an khel dawn tihna a ni.

• Ruahmanna ang chuan 2021, 2025, 2029, 2033-ah te club World Cup hi khelh tur a ni a, tournament tinah hian a tlem berah pound tluk­lehdingawn 2.15 zel sem ral tura ruahman a ni.

Nations League
Europe foootball thuneitu sang ber UEFA leh CONCACAF (North America, Central America and the Caribbean) te chuan an khawmualpuia Nations League kalpui turin ruahmanna an nei tawh. FIFA chuan he ruahmanna hi kalpui ve a duh a, an hnuaia awm ramte chu international match calendar awm sa ring chunga match awmze nei zawk khel turin an duh.

Nations League hi kalpui a nih chuan 2020-21 aṭanga hman ṭan tur a ni dawn a, a tlem berah pound maktaduai 700 chu sem ral a ni ang a, hei hi pound tluklehdingawn 2.87-ah 2033 chuan a kaisang thei ang.

Khawi ami nge heti zat sum?
Zawhna awm chu FIFA hian heti zozai sum hi engtinnge a neih theih? tih a ni. FIFA presi­dent Gianni Infantino chuan thla hmasaa Colombia-a Council member intawhkhawm an neih ṭumin Asia, Europe leh North America aṭangin investor an neih thu a sawi.

FIFA leh investor ho thawhhona tur company thar siam a ni ang a, FIFA chu share ngah ber niin 51% neitu nihna an nei ang. FIFA hian thutlukna pawimawhah chuan a pumhlumin thutlukna a siam thei ang a, a bik takin football 'bik' ngawr ngawr thutluknaah phei chuan a thu hle ang. Hei mai a ni lo, he board-a member zahve chu FIFA-in a ruat tur liau liau an ni.

Inremnaa ziah a nih angin investor-te hming hi tarlan a ni lo a, inremna hi kum 12 (2021-2033) chhung atan niin dollar tluklehdingawn 25 zet sum hi hman tur a ni a, tluklehdingawn 13 chu Nations League tan niin Club World Cup atan dollar tluklehdingawn 12 a ni ang.

Hmalakna dang
FIFA chuan Nations League a awm dawn avangin Confederations Cup chu nuai bo an duh a, FIFA-in hemi a duh chhan a tarlan dan chuan football chu khawvel huapa tih lar lehzual an duh a, tuna Club World Cup leh Confederations Cup kalphung hian chu chu a thlen theih an beisei lo.

Investor-te chuan FIFA digital platform tih len nan tluklehdingawn khat dah an rel bawk a, hemi ruahmanna hmang hian fan-te hnen thleng phak thil tam tak an siam theih an beisei.