National Mini Volleyball Championship ; Mizoram mipa team an tlang

26th National Mini Volleyball Championship mipa champion lai Uttar Pradesh lakah Mizoram chuan 3-1 a hnehna changin quarterfinal an lut, hmeichhe team pawhin knock out round an lo inhlangkai ve tawh bawk.

Nilaini zan R. Dengṭhuama Indoor Stadium, Mualpuia inkhelah Mizoram mipa team hian Uttar Pradesh lakah 25-16, 25-22, 18-25, 25-23 in hnehna an chang a, an match hmasa lamah Karnataka leh Jammu & Kashmir an hneh tawh bawk avangin point kua hmuin Pool A hmahruaitu an ni.

Mizo player-te an kum a la tam loh ngaihtuahin an huaisen a, anmahni aia pum raw lian zawk Uttar Pradesh lakah pawh an zam lo - inkhel inhnehtawk takah rilru fim an neih theih avangin, coach PC Lalhriatpuia leh assistant coach Lalrinliana Royte te enkawl hi team dang ten an chung en rih hle.

Nimin khan Mizoram team hi an match hnuhnung ber khel tur an ni a, mahse an khingpui tur Haryana an rawn inlan loh avangin 3-0 in chaka puan an ni a, hneh loh nei loin league round an khar thei.

Mipa inelna huangah hian team 20 an tel a, pool liah ṭhen hran niin an inkhelh kual vek hnuah pool pakhata a sang pahnih zelin knock out round an lut chho dawn a ni. Inelna hi April 28, Inrinniah zawh tur a ni ang.

Mizoram hi Pool A-ah Uttar Pradesh, Jammu & Kashmir, Karnataka leh Haryana te nen an awmkhawm a, a sang pahnihin quarterfinal an lut dawn a ni. UP leh J&K ten match hnih an khelh tawhah point thum an nei a, Mizoram hnung zui tur zawk a la chiang lo.

Hmeichhia an chungnung
Hmeichhe inelna lamah pawh Mizo tleirawlte an chungnung hle. Mizoram team-in nimin khan an pool match hnuhnung ber chu Kerala nen an khel a, he thu buatsaih lai hian result kan hre hman lo.

Mizo hmeichhe team pawh an khel ṭha hle, Group G-a an awmpui Maharashtra, Karnataka leh Bihar te an hneh vek tawh avangin an group aṭangin an tlang dawn tih a chiang tawh a ni.

Hmeichhe inelna lamah hian team 18 an inlan thung a, group paliah ṭhen hran niin an inkhelh kual vek hnuah a sang pahnih zelin quarterfinal an lut dawn a ni. Quarterfinal-a intum turte hi pawh ṭhat leh a nih dawn avangin, he thu buatsaih lai hian Mizoram mipa leh hmeichhe team ten knock out round-a an khingpui tur hi kan hre hman lo.