Mizoram Jr Basketball Team inpuahchah

National Junior Championship khel turin Mizoram Junior Basketball Team chuan ngawrh takin coach Samuel Lalthlamuana hoin Hawla Indoor Stadium-ah training an nei mek.

Kum 18 hnuai lam inelna hi May 7 hian Ludhiana, Punjab-ah neih a ni ang a, Mizoram team hian April 30 hian Aizawl an chhuahsan ang.

Mizoram aiawh tur player 12 zingah pathum Zonunsanga, Ronald Zomuanpuia leh Lalhnehpuia te chu Mizoram Super League-a inlan tawh an ni a. Zonuna hi Zarkawt BCA champion puitu niin MSL4-a player langsar ber zinga mi a ni a, Mission Vengthlang Hollow tana khel Ronald hi MSL4-ah point per game-a point ngah ber a ni a, Lalhnehpuia hi hmabak nei êng ber zinga mi a ni.

Mizoram coach Samuel Lalthlamuana chuan, "Mizoram hi Level 2-ah kan awm a, kan tum tur chu Level 1 thlen phak a ni a. Hei bakah hian national team-a pahnih khat hnawh luh chu kan tum tur a ni," tiin Vanglaini a hrilh.

India rama basketball inelna lianah hian team ṭha 10 chu level 1-ah an awm a, a bak zawng chu level 2-ah an awm thung. Level 2 aṭang hian a sang pahnihin level 1 an kai ang.