Wilder-a'n Joshua a cho leh ta

WBC world heavyweight champion Deontay Wilder chuan vantlang hriatah inhnekpui turin Anthony Joshua a cho leh ta a, British boxer hian an chona hi a pawm a nih chuan pound maktaduai 35.9 an pek theih tur thu an sawi bawk.

Wilder chuan Joshua-a chona thu hi twitter-ah video-in a pholang a, WBO, IBF leh WBA title kawltu Joshua-a'n mimal takin la chhang lo mah se a promoter Eddie Hearn erawhin a chhang thung.

Hearn chuan, "Joshua chuan Wilder nen inhnek dawn ta se, tuna an sum sawi ang zat hi a awm ngei ang em tih a hre duh. Inhnek hmachhawn ngei tura contract ziah vek hnua sum zawn chawp leh chauh lam keini chuan kan sawi lo a, tunah sum hmuhna tur an hre lawk a nih chuan chu chu kan hre phawt duh a ni," a ti.

Promoter lar Eddie Hearn chuan sawi zawmin, "Deontay hian fing takin hma a la a, a nihna takah chuan intihlar nan chona hi min rawn thawn phawt ni berin a lang. Tunah chuan mi zawng zawngin 'sawm in nih chuan hmachhawn ta che u' min ti tawh ang.

"Mahse, a pawimawh hmasa ber chu sum hi a awm ngei tih kan hriat hi a ni. UK-ah hian hmalakna tam tak kan neih tawh avangin he ram chhung ngeia fight hmachhawn kan duh a, mahse Wilder sawi anga sum hmuh tur a awm tak tak a nih chuan hmun dang pawh kan pawiti chuang lo," a ti a, Las Vegas lama inhnek an pawiti lo.

Wilder hian Joshua hnena an sum pek phal zat a sawi bakah, "Joshua, Eddie Hearn hnenah khana email en sak dil rawh. I manager Rob McCracken pawh ka thawn tho a, ring chhunga intawn hlan ka nghakhlel takzet a ni," a ti.

Hearn thusawi tlangpui

• Intihlar tumna mai a ang a, mahse Wilder hmachhawn erawh kan chak reng.

• Wilder leh a team-te hi inhnekna tur hun leh hmun phalsak an ni mai thei.

• Vawiinah fighter pahnih leh an aiawhten inbiakna an nei ang.