Chennai Super Kings mawina MS Dhoni
Mahendra Singh Dhoni a la tar thei lo - India captain hian Nilaini zan khan Indian Premier League inkhelah run 70 ngawt vaw chhuakin a tawp thleng a dam a, Chennai Super Kings chu Royal Challengers Bangalore lakah wicket ngain hnehna a chanpui.
Chennai Super Kings leh Bangalore club inkhelah hian Indian Premier League chanchin chu a thara ziah kaiin a awm ta bawk a, team pahnihin six vawi 33 ngawt an vaw chhuak - IPL match khata six vuak chhuah hnem ber ṭum a ni.
ABD = RCB
Bangalore khawpuia inkhelah mualneitu team an bat hmasa zawk a, opener Quinton de Kock chuan run 53 ngawt a rawn vaw chhuak nghal. De Kock chet ṭhat laiin Virat Kohli erawh beisei a phak lo a, run 18 chiah a siam.
Mahse, Kohli meuh a out hnuah pawh RCB-in AB de Villiers an nei a, South African batsman hian Bangalore club ṭantute beiseina chhi nung turin run 68 a rawn vaw chhuak.
RCB batsman Mandeep Singh chuan run 32 a rawn siam ve leh bawk a, over 20-a zawh meuh chuan Bangalore club hian run 205 an siam a, wicket riat an hloh - heti zat target thlir chuan ngaihṭhatna tham niin a lang.
Hei le Dhoni
CSK bat hun a thleng a, opener Shane Watson chu run riat chiah a siam tihin a out nghal - beiseina a tlem hle. Mahse, Watson nena bul rawn ṭan dun Ambati Rayudu chuan run 82 ngawt a rawn vaw chhuak ve leh.
Rayudu-a'n dinpui nghet erawh a nei hleithei lo a, Suresh Raina (11 runs), Sam Billings (9) leh Ravindra Jadeja (3) te run pawh siam mumal loin an out phuk phuk a, an target a san bawk si avangin Rayudu chauha innghat chi an ni lo.
Chennai Super Kings tan a hunah tak MS Dhoni a rawn ding chhuak a, ball 34 lekah run 70 siamin a tawp thleng a dam a, six vawi sarih ngawt a vaw chhuak bawk.
A tawp ngaihnawm
CSK leh RCB inkhel hi batsman nei ṭha ve ve an ni a, a hmuhnawm takzet. Bangalore club-in run 200 chuang an siam avangin CSK tan Rayudu leh Dhoni rawn hmuhnawm viau mah se chak turin over tawp thleng an nghah a ngai.
Chennai club-in over tawp ber an thlen hian hnehna chang turin run 15 an la mamawh a, over tawp bera ding dun hi Dwayne Bravo leh MS Dhoni an ni. Bravo hian ball hmasa pathumah four, six leh 1 a vaw chhuak.
Dhoni hun a thleng a, run li an la mamawh. CSK captain hian boruak sanga talbuai tur a ni lo tih pholangin run ruk a rawn vaw chhuak a, Chennai club hi hnehna a chanpui - CSK hian over 19.4-ah run 207 siamin wicket nga an hloh a, wicket ngain hnehna an chang.