Bayern an bil, Real dinhmun a tha

Bundesliga champion Bayern Munich-in Champions League champion lai Real Madrid lakah an theihna tak an lantir thei lo a. Nilai zana semifinal first leg inkhelah mikhual Los Blancos 2-1 in an chak. Santiago Bernabeu-ah May 1 zan hian second leg khelh a ni dawn a, minute 90 khelh leh tur hi a hmuhnawm khawp ang.

Allianz Arena-ah Joshua Kimmich hmangin minute 28-naah Bayern-in hma an hruai a, Real-in Marcelo hmangin first half tawp hma hretin an sut a, substitute Marco Asensio-a'n minute 57-naah chakna goal a khung.

Spanish club-in Zinedine Zidane-a hnuaiah kum thum chhung a zawnin Champions League nomawi chawi an tum a, kawng dik an zawh zel. Bavarians erawh Jupp Heynckes hnuaiah treble champion nawn thei dinhmunah ding mah se an hmabak a harsa dawn.

A nung nghal!
Bayern manager Heynckes-a'n attacking khel thei player a thlan tam avangin goal lut loin an ṭin a rinawm lo a, rin lawk ang ngeiin ṭan phat aṭangin Bavarians goal nawr a na nghal.

Minute khat pawh a tlin hmain Lewandowski ball pass ṭha chu Muller-a'n goal-ah a chantir thei lo a, Real an vannei a, Bayern an vanduai chhunzawm. Robben chu hliam vangin minute riatna lekah lakchhuah a ni a, Dutch winger aia lut Thiago ṭha mah se Heynckes-a'n a duh vang ni loin game plan a thlak a ngaih phah.

Bavarians captain Muller chu a ṭhatna berah awm thei loin mual ding lamah Robben-a hmun ruak a luah ngai ta thung a, inkhel kalhmang a danglam phahah a ngaih theih a. Inkhel hmuhnawm tura beisei pawh team pahnih goal bawh a nat tawk loh avangin mipui beisei a phuhruk zo lo.

Minute 28-naah wing back Kimmich-a'n dinglam aṭangin Bayern goal hmahruai a khung a, cross rin vanga tlu lawk Real keeper Navas-a'n a tih tur a ti lo a, Los Blancos-in a thlakna tur an zawn chhunzawm zel a rinawm.

Real hun a inṭan
Bayern-in inkhel thunun lo mah se goal-ah an hlauhawm zawk a, amaherawhchu an buaina belhchhah turin defender rinrawl Jerome Boateng chu lakchhuah a ni a, Hoffenheim tana Lammualah pawh lo inlan tawh Niklas Sule a rawn lut.

Real innghahna Ronaldo hmuh tur a awm meuh lo a, goal khung khawl ber a nun theih miau loh avangin mikhual team hnufual lo mah se an goal nawr a na lo. Amaherawhchu rin loh lam aṭangin Marcelo a rawn inlar a, minute 44-naah Brazilian left back chuan a ball hmuh chu vawi khatah pet nghalin goal kilah a lut.

Bayern-in hmahruaina hun ṭha an nei leh nghal a, James Rodriguez-a cross chu Lewandowski-a'n keeper zawnah chauh a tauh thei a, chawlhlawk an hmang zui. Second half-ah Isco aiah Asensio a rawn lut a, Real substitute hian Rafinha tihsual chu goal khung nan a hmang.

Minute 57-naah Rafinha pass fuh tawk lo chu Asensio hian nang fuhin an nawr let nghal a, Lucas Vazquez nen an inthlawp hnuah kum 22 mi Spanish midfielder hian 'cool' zetin a pet goal. Darkar chanve chhung khelh tur awm mah se Bayern an tho chhuak thei lo a, Allianz Arena-ah Real-in hnehna an chang.