Vawiinah Div I Futsal Final

MFA Futsal Division I Season Ending Tournament final khel tur a hriat ta a, vawiin chawhnu dar 2:30 hian Lammualah Paul FC leh Cici Store, Dinthar ten nomawi an inchuh ang.

Division I club-te tana buatsaih inelnaah hian team 18 an inlan a, inelna hnuhnung ber champion Zonuam chu an match hmasa berah an chak lo nghal a, finalist IDBI Capital kalkawng pawh semifinal-ah a tawp a. Niminah khan quarterfinal leh semifinal khelh a ni a, goal a lut tam hle.

Quarterfinal-ah Paul FC-in Ramhlun South FC, Jr 6-3 in an hneh a, semifinal-ah IDBI Capital chu 7-5 in an hneh leh bawk. Paul FC hian tualchhung player ṭha an kawl hnem a, an squad a chhah ṭhat avangin tun ṭumah hian champion rinkai an ni. Nimina Paul FC tana goal khungtu F. Lalrinpuia, Lalsangbera, Lalbiakhlua, Ramfangzauva leh Jesse Laldinpuia te chu Santosh Trophy-a Mizoram aiawh tawh vek an ni.

Dintharin inkhel thiam veng tih an pholang leh a, an veng club Cici Store chuan rinkai ni phak lo mah se final an thleng. Cici Store hian quarterfinal-ah Bawngkawn chu 4-2 in an hneh a, semifinal-ah Rangvamual club Los Blancos chu 11-3 zeta an hneh theih avangin Paul FC tan pawh fimkhur a ṭul ang.