Wenger thlaktu tur a la chiang lo

Arsenal manager Arsene Wenger-a'n club a chhuahsan tur an puan hun chu a duhthlanna a nih loh thu a sawi. Kum 22 deuh thaw Gunners enkawl tawhtu hmun ruak luah tur tih chian theih a la ni lo.

French manager Wenger hian April 20 tlai khan Emirates Stadium a chhuahsan tur thu a puang a, Premier League manager ṭanglai zinga mahni hna ngai chelh rei ber a nih avangin a thu sawi hian sawi zui a hlawh hle.

Kum 68 mi Wenger chuan, "Club ka chhuahsan tura inremna kan siam hnuah, a puanchhuah hun chu club lamin ṭha an tih angin a hunah tak kan ti," a ti. Wenger hian team enkawl hna erawh chawlhsan mai a la tum loh thu a sawi tel bawk.

Premier League vawi thum champion tawh Wenger thlak tur an inrin siak mek a, Gunners captain hlui Patrick Vieira leh Barcelona manager hlui Luis Enrique te chu hming langsar an ni.

Manager thar chungchang sawiin Wenger chuan, "Manager thar lak tur chungchangah inrawlh ka tum hran lo, chutihrualin Luis Enrique chu mi ṭha tak a ni tih ka sawi thei," tiin a sawi.

Arsenal chuan a rang thei ang berin manager thar tur an puan tur thu an sawi a, chief executive Ivan Gazidis chuan manager thar zawn chu hna hautak leh khirhkhan tak, ngawrh taka an thawh mek a nih thu a sawi ve bawk.

North London club hian nizan khan Europa League semifinal khelin Atletico Madrid an mikhual a, Wenger-a kaihhruaina hnuaia an khelmuala European football an khelh hnuhnung ber a ni–he thu buatsaih lai hian result kan hre hman lo.