Halep leh Kerber an tlang

Hmeichhe tennis world number 1 Simona Halep chuan Stuttgart Open-a a match hmasa berah fiahna a paltlang nghal a, champion thei tura rinkai zinga mi Angelique Kerber pawhin hnehna a chang ve bawk.

Nilaini zan inkhelah Halep hian 2017 Wimbledon semifinalist Mag­dalena Rybarikova lakah set hmasa ber a hloh a, mah se set hnihna aṭang­in a tawnhriat hmang ṭangkaiin 4-6, 6-2, 6-3 in a hneh let thei.

Kum 26 mi Halep hian season tir lam khan Shenzhen Open nomawi a chawi tawh a, Australian Open final a lut bawk. Mahse, season dang ang bawkin Garnd Slam nomawi a la chawi thei lo, Australian Open-ah hian pahnihna a ni. May thlaa khelh tur French Open atan inbuatsaihna a nei chho mek a, vawi hnih final a luh tawhnaah hian world number 1 ni chungin inlan a tum.

Romanian nula Halep chuan, "Tun hma pawhin Rybarikova nen kan inkhel tawh a, ani hi chu engtik lai pawhin hmachhawn a awlsam ngai lo. Set khatna kha a khel ṭhain ka tan chet a har hle, set hnihna aṭang khan ball vuak dik tam a pawimawh tih ka hria a, backhand zawnga a vuak turin ka pe hnem bawk," tiin a sawi.

Inkhel dangah World number 12 Kerber chuan Wimbledon vawi hnih champion tawh Petra Kvitova chu 6-3, 6-2 in a hneh ve bawk. German nula Kerber-i'n inkhel tir aṭanga a tawp thlengin a thunun a, tun hnaia rawn khel ṭha leh Kvitova hmaah a chesual duh lo.

Grand Slam vawi hnih champion tawh Kerber chuan, "Pathianni zanah kan inkhel zo chiah a, ka tan chuan court chhunga luh kha a zamawmin ka hmul thi a ding sung sung thei a ni," tiin hmanni lawka a hneh loh nen an inkhelh chungchang a a sawi.

Pathianni zan khan Germany leh Czech Republic ten Fed Cup semifinal an khel a, Stuttgart Open an khelhna court ngaiah chiah hian Kerber hi Kvitova lakah a tlawm, semifinal aṭangin an tla bawk. Ni thum hnuah an intawng leh a, world number 1 hlui Kerber-i'n hnehna a chang let ve thung a ni.

Halep leh Kerber te an inlan hmain American player ṭha pahnih an intawng a, seeded pasarihna Sloane Stephens chuan a hnampui Coco Vandeweghe chu 6-1, 6-0 a sawpin, Anastasia Pavlyuchenkova pawhin Madison Keys chu 7-6 (9-7), 5-7, 6-4 in a hneh ve bawk.