Lionel Messi, a mawi e!

Barcelona kawr nena khawvel hriat ṭhin Lionel Messi kha, Paris Saint-Germain kawr nen pawh thiam tawpin a la thiam. Argentine forward Messi hian Parc des Princes-ah European champion Chelsea hneh hlim Premier League champion Manchester City lakah goal ropui bik a khung.

Thawhlehni zan Champions League inkhel hmuhnawmah hian PSG-in Pep Guardiola kaihhruai Man City 2-0 in an hneh a, French club goal hnih hi Idrissa Gueye leh Messi te khung a ni.

Kum 34 mi Messi hian Paris club a zawm hnuah ni 48 chhungin match thum khelin goal a khung lo a, sawiseltu pawh an ṭhahnem hman hle. Tunah erawh PSG number 30 hian goal mawi hmangin amah seltute ka a hup.

Goal mawi chu
PSG-in Senegalese midfielder Gueye hmangin minute riatna lekah an khung hmasa a, Man City lamin siphurh sut tumin na takin an nawr let. French club tan dinhmun hima awm turin goal dang an mamawh a, hetiang hun hi player danglam bik inlar hun chu a ni.

Minute 74-naah Marco Verratti chuan mual dinglam kila awm Messi chu ball a pe a, hei hi ball-in pass pangngai ni mah se a ball changtu hi Ballon d'Or ṭum ruk dawng tawh a ni tlat.

Messi hian awm loa ta chu awmah a siam chawp a, mual laiah a khalh lut. PSG right back Achraf Hakimi chuan City left back Joao Cancelo chu mual sirah a hruai chhuak a, Argentine forward leh Aymeric Laporte an inhmachhawn chiah.

PSG tlarhma theihna a rawn lang a, Messi hi Kylian Mbappe-a'n rawn thlawpin mawi zetin an in wall pass a, player ṭha pahnih vengtu Laporte leh Ruben Dias te tan dan hman a ni lo. Messi chuan box pawn chiah aṭangin a ke vei lamin goal kilah a pet lut. French club leh Messi ṭantute tan hun lawmawm bik a rawn thleng.

Hei le, MNM
PSG tlarhmaah Neymar, Mbappe leh Messi te an awm a, MNM hminglem an vuah. Player pathum hian a hran ṭheuhin an theihna sanzia an lantir tawh a, Man City lakah hian an inkawp rem theih zia an pholang.

Player pathum bik ball inpek kual zat hi vawi 44 a ni a, PSG player-te ball-in pass zawng zawng aṭangin 10% a tling pha. Inkhelh hmain khawtlang media-te chuan Neymar chungah ball pass loh vangin Mbappe a lawm lo tihte, Mbappe-a'n Messi leh Neymar pass aiin amah pual goal khung a ngai pawimawh tihte ziak bawk mah se MNM hi ropui zawkin an la inlar ngei a rinawm.

Chutiang bawkin PSG tana Messi goal ṭhahnem tak a khung tur zinga a hmasa ber chauh niin a lang a, Argentine forward hi chu player ropui dang zingah pawh a ropui bik. Man City nena an inkhelh ṭum hian freekick-a wall an siam ṭumin lei hrula ball a lo kal loh nan Messi hi a mu a, hei ringawt pawh hi football ngainatute titi a tling pha.

Messi a lawm
PSG forward Messi chuan, "Club Brugge nen kan inhnehtawk avangin chak ngei kan mamawh a, team ṭha taka hnehna kan chang hi kan lawm. Goal hmasa ber khung chu a hlu e. Match ka khel tam tawk lo a, kan mualah phei chuan ka vawi hnih khelhna chauh a ni.

"Kan khelho tam ang a, kan inhrechiang zel ang a, hma pawh kan zawn zel ang. Khel ṭha thawkhat mah ila hmasawnna tur a tam. Tih ṭhat lai nei bawk mah ila, tun aia rei kha kan chet ṭhat a ṭul. Inkhel kan thunun theih a ngai a, chu chu kan ti thei a nih chuan result ṭhain a rawn zui ang," tiin inkhelh banah a sawi.

Messi an fak
Champions League final-a a tak ngeia Messi thiamzia hmu tawhtu Manchester United defender hlui Rio Ferdinand chuan, "A tlan chakna te, a thahrui te, a taksa chevel dan te leh a ball pet dan thleng khan a bu ang thlap a ni. A ropui teh e.

"Club tharah bul a ṭan a, superstar meuh pawhin pressure an nei ve. A goal khung a lawm dan khan engkim a sawifiah a, goal ropui kha a chunga pressure nasa tak chu a chhawk zangkhai a ni. Kan nghak rei ta bawk a, nghah man a awm," tiin thiam takin Messi leh a goal khung a fak.

Man City manager Pep Guardiola chuan, "Inhliam dam hlim a ni a, a theihna tak lantir turin hun a mamawh tih kan hria. Chutihrualin ball a tlanpui tawh chuan dan theih a ni lo. Minute 90 chhung Leo ven chu thil theih a ni lo," tiin Barcelona-a a player hlui a fak hle.

Man City an khel chhelo
Parc des Princes-ah Pep Guardiola kaihhruai Manchester City chak lo mah se PSG laka an khelh danah hnualna tur an awm lo. Premier League champion keeper Ederson-a'n vawi khat chauh save a neih laiin PSG keeper Gianluigi Donnarumma-a'n vawi sarih a save.

First half-ah Kevin de Bruyne-a cross chu Raheem Sterling-a'n cross-bar a tauh per a, hemi per hi Bernardo Silva-a'n goal ruakah a khung lo. Portuguese midfielder hian goal chu khung nghat se 1-1 a ni ang a, result a danglam thei hial ang.

Man City manager Pep Guardiola chuan, "Goal khung tih loh zawng chu kan ti vek. PSG-in goal venhim a, counter attack hmanga nawr let an tum. An tumah an hlawhtlin avangin ka lawmpui. "Chutihrualin ka team-te khelh danah ka lungawi a, Stamford Bridge-a kan khelh ṭum ang thoin an khel ṭha. Goal hmaah kan vanduai mai a ni. Kan hahdam phawt ang a, Pathianni zana Liverpool hmachhawn turin kan inpuahchah ang," tiin a sawi.

Premier League cham-pion hian Pathianni zan dar 9:00 hian Liverpool hmachhawn turin Anfield-ah an leng lut dawn a, Pep Guardiola hote hian hnehna an chang a nih chuan league hmahruaitu an ni ang.

Rilru fim takin kan awm a ṭul - Mignolet
Club Brugge-in an match hmasa bera PSG an chelh hnuah Thawhlehni zan khan Red Bull Arena luhchhuahin RB Leipzig 2-1 in an hneh. German club hian Christopher Nkunku hmangin minute ngana lekah khung hmasa mah se Brugge hian Hans Vanaken (22') leh Mats Rits (41') te goal hmangin an lehthal.

Belgian keeper Simon Mignolet chuan, "Hnehna kan chan hi kan chhuang a, lawm pawh kan lawm tur a ni. Chutihrualin rilru fim takin kan awm a ngai. Match hnihah point li kan hmu a, Belgian football tan a pawimawh. Kan hmabak inkhel tur hi match khat zela kan thlir thiam a ṭul a ni," tiin a sawi.

Champions League group A-ah PSG leh Club Brugge ten point li ve ve an hmu tawh a, Manchester City-in point thum hmu tawhin RB Leipzig-in point an la hmu ve lo.