Pacman a chawl ta - Politics 'ring' ah a lut tak tak dawn
Boxing khawvela hming dai tawh ngai lo tur Manny Pacquiao chuan boxing a chawlhsan thu a puang a, kum 42 mi boxer hian politics lamah a hun tam zawk a hman theih nan a boxing glove a khai ta.
Filipino boxer chuan, "A tawp khar nana dar vuak ri ka hria a, boxing khawvel chu a tawp ta," tiin inhnek a chawlhsan thu hi a puang a, an ram Philippines lama senator hna chelh mektu hian Philippines President nih a chuh dawn.
Pacman chuan boxing chawlhsan tura thutlukna siam chu a thutlukna siam tawh a zawnga harsa ber a nih thu a sawi a, "He boxing hian retheihna aṭangin min khai chhuak a, mi tam tak nun thlak turin huaisenna min pe bawk a ni," a ti.
Ka lawm e
Division hrang pariata world champion ni thei awmchhun leh major title 12 hnek chhuaktu Pacman chuan amah ṭantu, a ṭhianṭha amah thlawptu leh 'ṭhian, unaupa leh chhungkaw zinga mi' tia a koh, a trainer Freddie Roach te chu a career-a a hlawhtlinna avangin lawmthu a hrilh bawk.
Philippines-a rethei taka seilian Pacquiao hian rawlthar mai a nih laiin an ram khawpui Manila-ah boxing hmanga eizawn tumin a puanthuah nen a lut a, kum 1998 khan Thailand boxer Chatchai Sasakul hnehin WBC flyweight title a hlawh chhuak nghal.
Kum thum a liam meuh chuan Las Vegas khawpuiah inhnekin, South African boxer Lehlohonolo Ledwaba chu IBF super bantamweight title hlawh turin MGM Grand-ah a hneh a, a hnu zela a thil tawn ropui inhrilh nawn a ngai tawh lo.
Hun hnuhnung
Pacman hian a career-ah vawi 72 fight hmachhawnin vawi 62 a chak a, vawi riat a tlawm a, vawi hnih a khingpui a inhnehtawkpui. July 2019 khan kum 40 mi niin Keith Thurman a hneh a, WBA (Super) welterweight title hlawh chhuakin welterweight world champion ni thei upa ber a ni.
January 2021 khan a inhnek tam loh avangin a title hi hlihsak a ni a, August thla khan Yordenis Ugás chu rin loh takin a hneh lo zui. Pacman hian inhnek chawlhsan thei dinhmuna a din thu a sawi zui a, tunah chuan a chawl dawn ta.
May 2, 2015-a Floyd Mayweather Jr. nena an inhnek chu 'Fight of the century' leh 'Battle for Greatness' tih hiala sawi a ni a, Mayweather lakah tlawm mah se a ropuina erawh a nep phah lo.
Hello Politics
Pacquiao hi politics khawvelah a mikhual hran lo. Kum 2010 khan Philippine House of Representatives (lower house) ah member ni turin thlan tlin a ni a, kum 2016 khan Senate of the Philippines (upper house) ah senator atan thlan tlin a ni leh bawk.
September 19, 2021 khan Pacquiao hian nakkuma an ram President thlan tura a chuh tur thu hi a puang a, PDP–Laban party aiawhin a ding dawn a ni.
Kristian ṭha tak Pacman hian neih inang inkawpte pawh a lo dodal tawh ṭhin a, tun ṭuma an ram President ni tura a chuh chhan hi an ram eirukna do tur a nih thu a sawi a, an ram President ni lai Rodrigo Duterte-a'n China nena inṭhianṭhatna a kalpui chu a ngaimawh thu a sawi bawk.