Italy leh Argentina inkhel dawn

Euro 2020 champion leh Copa America champion Argentina te chu nakkum June thlaah an inkhel dawn, khawmualpui pahnih champion an inkhelh theih nan hian UEFA leh CONMEBOL te chu an inrem tawh.

Friendly match a ni dawn a, a ni leh a hmun ruat fel a la ni lo. A hmun hi tih fel la ni lo mah se, khawtlang media-te chuan Italy khawpui pakhat Naples-ah a nih an ring - Diego Maradona silhnu ropui hnutchhiah tawhna khawpui a ni.

Khawmualpui pahnih football thuneitu sang chuan thuchhuah inṭawm siamin, "UEFA leh CONMEBOL te chuan inremna leh thawhho dan tur hrang hrang kan duang, chung zingah chuan 2022 June thlaa Euro champion leh Copa champion inkhelh pawh a tel.

"Senior team pahnih inkhelh bakah hian hmeichhe football, futsal leh youth te inkhelh bakah, referee leh technical training in chhim tawn te pawh a tel ang. London khawpuiah office inṭawm hawn a ni ang a, chutah chuan thil pawimawh hrang hrang thawhho a ni ang," an ti.

UEFA leh CONMEBOL hian football hmasawnna chu an ngaih pawimawh ber a nih thu an sawi a, hetih lai hian FIFA lamin kum hnih dana World Cup neih an rawtna erawh an dodal a, a nghawng theih tam tak zingah player chu a tuar na tur nia an hriat thu an lo sawi tawh.

Europe leh South America hian club huangah chuan inelna an lo nei tawh, kum 1960 aṭang khan season khata khawmualpui pahnih champion-te an lo inkhel tawh ṭhin - 2005 aṭang khan huam zau zawkin FIFA Club World Cup tia siamrem a lo ni tawh a ni.