Raducanu tan Indian Wells wildcard

US Open champion Emma Raducanu chu Indian Wells-ah qualifier khelh hah ngai loin a inlan thei dawn. Tournament buatsaihtu lam chuan duhsak takin Britain tleirawl hi wildcard an pe.

October 4-17 chhungin California-ah inelna neih a ni dawn, kum 18 mi Raducanu tan New York khawpuia hlawhtlinna lian a chan hnuah tun ṭum hi inelna a hmachhawn leh hmasak ber tur a ni ang.

World number 22 Raducanu hian a tam thei ang tournament khelh a tum. Indian Wells bakah hian Russia leh Romania ramah pawh inelna a hmchhawn dawn a, result ṭha a neih zel a nih chuan a thiam zual pariat inelna WTA Finals khel thei turin kawng a la inhawng a ni.

Raducanu a inlan dawn lai hian Ashleigh Barty erawh a inhnukdawk thung. World number 1 hi a chhungte hmu turin Australia-ah a haw mek a, tun season chhungin a la inkhel zui dawn em tih erawh thu tlukna a la siam rih lo.

Kum 25 mi Barty hi hripui len laiin a inkhel tam lo. WTA Finals pawh Mexico lama khelh tura an sawn avangin a inlan lo mai thei. North America lama zin hnuah Asia-ah a kir leh a nih chuan kar hnih chhung inkhung hran a ngai dawn a, January thla a khelh tur Australian Open a nghawng thei.

Tun thla tir khan Barty-i coach Craig Tyzzer chuan, "A nomawi humhim turin WTA Finals a khel lo mai thei," tiin a lo sawi zauh tawh a, thutlukna tak erawh an la puang lo thung.

Barty bakah hian 2018 champion Naomi Osaka leh Serena Williams te pawh an inlan dawn a, player langsar leh midang tan pawh nomawi chawi theihna kawng a inhawng zau sawt dawn tihna a ni.