Real tlawmna hriat ngai loh chhingkhual Sheriff!

"Football-ah chuan eng pawh a thleng thei," tia sawi a ni ṭhin a, a dikna hmuhtirin kan awm leh ta - a mak asin! Thawhlehni zan khan Champions League-ah Real Madrid-in hriat ngai loh Sheriff Tiraspol an mikhual a, 2-1 in an tlawm.

Ni e, i chhiar dik a, i mit ngeiin i hmu tawh e - European champion vawi 13 ni tawh Real-in a vawi khat nana European club football inelna sang ber kheltu Sheriff an mikhual a, Santiago Bernabeu-ah milian zawk kha tukdawlin an awm.

Sheriff tan Jasurbek Yakhshiboev leh Sebastien Thill ten goal khat ve ve an khung a, Real tana Karim Benzema penalty chhuih luh chu scoreline timawitu satliah mai a chang ta rih. Sheriff hian an match hmasa berah rin loh takin Shakhtar Donetsk an lo hneh tawh a, Real leh Inter Milan awmna group-ah hmahruaitu an ni ta daih.

Inter hian Thawhlehni zan vek hian khualmualah Shakhtar Donetsk an lenchilh a, inkhelah goal a luh loh avangin 0-0 in team pahnih an inhnehtawk. Italian champion hian point khat chauh neiin table-ah pathumna dinhmun an luah mek.

A mak
Ni 580 hnua a vawi khat nan Real chuan Bernabeu-ah Champions League football an khel a, chak ngei tura ngaih sa an ni a, Real fans ruhkawl lo chuan inkhel en tur dang a awm bawk avangin an en kher lo ang. Mahse, beisei loh result kha a thleng tlat.

Bernabeu-ah Sheriff hi goal khung hmasa zawk an ni a, Yakhshiboev chuan minute 25-na lekah goal hmahruai a khung. Real-in inkhel an thunun zui a, Benzema-a'n minute 65-naa penalty hmanga si phurh a sut phei chuan Real bawk an chak dawna ngaihna a lian hman.

Mahse, football a ni miau a, hun tawp nan minute hnih chiah a awm tawh tihah Thill chuan Sheriff tan goal a rawn khung. Real an hawihai a, Moldovan club lawmin an sapatal thung. Spanish club an tho tawh lo a, 2-1 in Sheriff an chak.

Real-in 76% zet bal chang chungin vawi 31 shot an nei a, chung zinga 11 chu goal zawnah a kal. Mikhual Sheriff lamin vawi li shot an neih zinga vawi thum chu target-ah a kal a, goal hnih an khung.

Vanduai Real
Real boss Carlo Ancelotti chuan, "Kan vanduai a ni. Thil hotê vangin kan tlawm a ni ber. Counter attack leh throw-in hmangin goal an khung a, keinin shot tam tak kan nei thung. Mahse, vanneihna hian a chang chuan kan lam a ṭang lo ṭhin. An tan engkim kha a ṭha zawngin a thleng a ni ber a, keini tan engkim kha a chhe zawngin a thleng thung a ni," a ti.

Sheriff captain Frank Castaneda chuan an mang ram a thlen dik thu a sawi a, "Tunah chuan last 16 luh hi kan beisei a ni a, kan tum bawk a ni," a ti a, chakna goal khungtu Thill chuan, "Ka career-a goal ṭha leh pawimawh ber a ni," tiin a sawi ve bawk.

Luxembourg international Thill hian an ram club Progres Niederkorn aṭangin Sheriff hi loan-in a zawm a, season hmasaa loan-a a khelhna Russian club FC Tambov chu May thla khan sum lama an tlakchhiat avangin a tawp tawh. Thill chuan, "Ram hrang hrang player kan tam em em a, chu chu kan chakna hnar a ni," a ti.

Sheriff player-te hi Moldova, Serbia, Greece, Colombia, Malawi, Bosnia & Herzegovina, Brazil, Trinidad & Tobago, Peru, Niger, Mali, North Macedonia, Ghana, Luxembourg, Slovenia, Uzbekistan, Ivory Coast leh Guinea mite an ni hlawm - ram hrang hrang player an tam hle.

Tute nge Sheriff?
Moldovan football-ah chuan Sheriff an mikhual lo - league vawi 22 an hmachhawnah vawi 20 an champion a, Champions League erawh an vawi khat khelhna a ni. European football-a club inelna sang ber khel tur hian first qualifying round aṭangin an inlan a, an chak chhoh vek avangin group stage an inpetkai.

Group stage match an khelh hmain match riat an khel hman tihna a ni a, qualifier lamah pawh anni aia team ṭha leh tawnhriat nei ṭha zawk Red Star Belgrade leh Dinamo Zagreb an hneh a, group stage khelh phak pawh an tan chawimawina a nih laiin last 16 an mitthla ta.

Sheriff coach Yuriy Vernydub hian December 2020 khan Moldovan club hi a enkawl ṭan ve chauh a, a season hmasa berah league nomawi a chawipui a, Champions League hial a inpetkaipui - tun hmain Ukrainian Premier League club Zorya Luhansk leh Belarusian Premier League club FC Shakhtyor Soligorsk te a enkawl tawh.

Chakna goal khungtu Thill khan a keah Champions League a ngaihtuah lai lem tattoo a nei a, goal hmahruai khungtu Yakhshiboev kha Asia mi niin Uzbekistan international a ni bawk. Club captain Castaneda kha kum 27 mi a ni a, kum 2017 kha chuan an ram Colombian second division club-ah a la khel.

Inter an reh
Champions League an match hmasa bera Real Madrid ngam lotu Inter Milan-in Shakhtar lakah chak beisei mah se beisei an phak lo a, goal khung loin Ukrainian club nen an inhnehtawk - club pahnih tan last 16 lut turin hmabak a ko ta hle.

Inter Milan tan Edin Dzeko chuan hnai set sawt aṭangin goal khungna remchang nei mah se holam takin a hlah a, tun season league match ruka goal nga khung tawh striker tih atana mawi lo a ni.

Shakhtar goalkeeper Andriy Pyatov chetsual zarah Lautaro Martinez chuan goal khungna remchang nei mah se a chhawr bik lo a, Nicolo Barella-a'n bar a tih per a, Joaquin Correa leh Stefan de Vrij te goal khungna remchang chu kum 37 mi keeper Pyatov-a'n ṭha zetin a dang bawk.

Ukrainian club-in chance nei lo an ni bik lo a, Manor Solomon leh Tete ten goal khungna remchang an neih an chhawr bik lo a, a tawpah team pahnihin point khat ve vea lungawi an zir a ṭul.