Liverpool tan hna harsa a awm lo; Milan ngamtu Atletico

FC Porto khelmuala hnehna chang turin Liverpool-in harsatna an tawk lo a, Portuguese club hi 5-1 zetin an sawp. Reds tan Mohamed Salah leh Roberto Firmino ten goal hnih ve ve an khung a, Sadio Mane chuan goal khat a khung ve bawk.

Liverpool-in match hnih an khelhah hnehna an chan ve ve avangin last 16 luh beiseina a sang ta viau a, October 3 zanah Premier League match khel tura Manchester City an mikhual zui dawn avangin hahdam hman erawh an ni rih lo.

Group B inkhel dangah Atletico Madrid-in AC Milan lakah goal chhuah hmasa zet mah se an 'comeback' a, Antoine Griezmann chuan Madrid khawpuia a kir hnua a goal hmasa ber a khung bakah Luis Suarez chuan penalty hmangin a khung ve bawk.

Sir Roger = King Salah
Liverpool goal khungtu ropui, fan-ten 'Sir Roger Hunt' tih ngata an koh ṭhin Hunt chu September 7 khan a thi a, an player ropui hriatreng nan Liverpool player-ten an banah puan dum an hreng a, Reds tana match 492-a goal 285 khungtu hriatreng zanah goal an khung hnem hle.

Merseyside club tan Salah chuan minute 18-naah awlsam takin goal hmahruai a khung a, chawlhlawk hmain Mane chuan goal khat dangin a belh ve leh bawk. Minute 60-naah Salah bawk inlarin a goal hnihna a khung a, 3-0 in hma an hruai der.

Salah hian tun season-ah match riat khelin goal riat a khung ta a, Mane-a'n match riatah goal li a khung ve ta bawk. Salah goal khung hnuah Mehdi Taremi chuan Porto tan rawn tauh goal ve bawk mah se Iranian forward goal khungin a team a fuih phur zo lo.

Chuai lo Firmino
Porto-in an si phurh an sut ṭhen aṭangin minute thum pawh a liam hman lo. Salah thlak tura luhtir Firmino-a'n goal khung hna a thawk chhunzawm ve nghal a, Porto goalkeeper Diogo Costa lo tlan chhuak chu hmuin a man hman loh turin a pet goal a, minute 81-naah goal khat dang a khung belh bawk.

Liverpool tan rawlthar Curtis Jones a langsar a, Salah goal hmahruai chu a shot aṭanga ball kal a ni a, a goal hnihna tur a assist bawk. Firmino goal khung tur a assist hnuah a shot per aṭanga ball kal chu Brazilian forward hian a khung leh bawk - kum 20 mi Jones a khel ṭha takzet.

Jordan Henderson chuan Liverpool tana a match 400-na a khel bawk a, kum 31 mi midfielder hi a khel ṭha hle. Tlarhnung a pui ṭha a, goal nawr kawngah a thawhhlawk tel bawk - freekick aṭanga a hun ṭha neih Porto keeper-in a dansakte chu pui tak a ni.

Atletico an chak
AC Milan-in an mikhual Atletico Madrid lakah goal an khung hma a, Rafael Leao chuan minute 20-na lekah goal hmahruai a khung. Tun hnaia result nei ṭha thei lo Atletico an tlawm leh ngei dawn niin a lang a, mahse, minute 29-naah Atletico duhthusam a thleng.

Liverpool leh Manchester United nena sawizawm hlawh mek Franck Kessie chuan Marcos Llorente laka a foul avangin a yellow card pahnihna a hmu a, hnawhchhuah a ni. Player tam zawk ni chungin Atletico-in inkhel an thunun zui a, goal erawh an khung har hle.

Hun tawp nan minute ruk chiah a awm tawh tihah Griezmann a inlar a, French forward hian Atletico tana a match hmasa pangaah goal khung lo mah se goal khung turin theihna a la nei reng tih a pholang a, hun harsaah a team tana beiseina siam turin si phurh a rawn sut.

A tawpah Suarez
Player tam zawk ni chunga hun tam zawk khel chungin Atletico an reh rei hret a, point khatah an lungawi a ṭul mai dawn niin a lang hman. Mahse, hun pek belh minute sarihnaah an vanneihna a her chhuak a, Milan defender Pierre Kalulu chuan penalty area-ah a kutin ball a tawk fuh.

Suarez chuan he penalty hi goal-ah a chantir a, a team hnehna a chanpui - Barcelona tana September 2015-a AS Roma laka goal a khung hnua Champions League-a away goal a khung lehna hmasa ber a ni a, tun hnai match thumah injury time-a chakna goal a khung vawi hnihna a ni bawk.

Atletico manager Diego Simeone chuan, "In lamah chuan keini aiin an hlim em em ang. Second half tawp lam kan khel ṭha a, ka player-te an huaisen. Mahse, player tam zawk kan nih hma kha chuan Milan an ṭha zawk," a ti a, Kessie hnawhchhuah an chhawr thu a pha lo.

"Porto khan Brentford nena kan inkhel kha an lo en ve tih a chiang a, a tir aṭangin direct takin an rawn khel nghal a, a hma ang thoin kan talbuai leh bawk. Mahse, ka naute hi mihring ve tho an ni a, chuvang tak chuan Brentford laka inkhel aṭang khan ka thlak tam duh lo. Kan buaina kha khelmualah ngei chinfel ka duh a, chutiang tak chuan kan tiin ka hria. Zawi zawiin kan kal zel ang." - Jurgen Klopp, Liverpool boss