Europa League ; Tlarhnung rem phui a ngai - Brendan Rodgers
Leicester City manager Brendan Rodgers chuan hmasawn an ngaihna lai a sawi a, tuna a team enkawl mek tlarhnung pawp a hai lo - a rang thei ang bera thawm phui a pawimawh thu a sawi.
Foxes hian zanin dar 10:15 hian Europa League group match khel turin Legia Warsaw an tlawh dawn. Poland club hian an group match hmasaah Spartak Moscow an luhchhuah thei, English club tan pawh zuam sual theih tur chi an ni ang.
Tlarhnung pawp
Rodgers-a'n Leicester hi team nghet takah a siam a, mahse tun season chu a duh ang takin an la khel thei lo. Premier League an match hmasa berah goal chhuah loin Wolves an hneh, a hnu lamah chuan goal an chhuah vek.
Europa League-ah pawh Napoli lakah goal hnih an khung hmasa a, nuamsa taka chak thei tur angin lang mah se hun tawp dawn lamah an sut zawhtir - hliam leh hri leng vangin tlarhnung buaina hi an la chingfel thei rih lo.
Burnley laka goal hnih chhuah hlim Foxes manager Rodgers chuan, "Kan sulhnu hi ngun taka in thlir kir a nih chuan tlarhnung lam phui hi kan chakna thahrui pakhat a ni ṭhin, tun hnaiah erawh he kan record ṭha hi kan hloh.
"Goal nawr na tur chuan a hnung lam a phui hmasak a pawimawh, chutiang ti thei tur chuan player hliamte pawh an dam leh tawh," a ti. Season hmasa lama a rinrawl Jonny Evans chu chhawr theih a ni tawh a, tawnhriat nei ṭha Timothy Castagne a lo kir tawh bawk.
Tlarhma an ṭha
Jamie Vardy a awm chuan goal a awm tel ṭhin. English striker hian Burnley lakah own goal a nei a, mahse a tih sual thup nan goal hnih a khung zui. Vardy hi Legia Warsaw tlarhnung su ṭhiat turin a rintlak ang.
Rodgers tana buaina pakhat chu James Maddison a ni. English midfielder hi tun season bika a vawi khat nan an match hnuhnung berah bul a ṭan lo, Maddison aiah Ademola Lookman dah luh a ni thung - zaninah tu zawk nge lut ang tih a chiang lo.
April thla khan Maddison hi a inhlim a, khelmuala a lo kir leh hnuah goal a la khung lo, a ṭhiante khung tur pawh a la siamsak lo. Burnley nen an inhnehtawk ṭum hian hun tawp dawn lamah a lut ve chauh a, fans lamin manager thutlukna hi duh loin an au el hial.
Rodgers chuan, "Theihna sang tak a nei a, a duh leh tum angin a la khel chhuak lo tih chu kan hria. A talent hi kan zahsak tur a ni ang, hliam vanga chawlh reng hnuah chuan ngaiawh turin hun an mamawh," tiin a player a chhan.
Napoli fiahna
Serie A lamah match an khelh zawng zawngah Napoli an chak vek a, hmahruaitu an ni. Europa League lamah pawh Foxes laka si hnih an phurh hnuin a sut zo thei, inrintawkna an nei sang hle ang tih chu a chiang.
Luciano Spalletti naute hi eng ang taka ṭha nge an ni tih chu fiahin an awm zel dawn, zanina an hmachhawn tur Spartak Moscow hi chak mamawh an nih avangin a awlsam lo mai thei; Spartak hi season hmasa Russian Premier Liga-a pahnihna ni thei an ni tih kan hriat a ṭha ang.
Team pahnihte hi tun hmain an la intawng ngai lo, tunah chuan record siam theihna remchang a ni dawn a, bawhpelh loh an tum ang. Chak duh leh chak mamawh ve ve an ni miau a, inkhel a hmuhnawm dawn.
Italian club hian forward hmuh-nawm Lorenzo Insigne leh season duhawm hmangtu Victor Osimhen an nei. Nigeria international Osimhen hian Napoli tan tun season inelna hrang hrangah match ruk aṭangin goal ruk a khung thei, enbik hlawh a ni ang.