Champion lai Mumbai Indians an chak

Indian Premier League-ah Mumbai Indians chuan Nilaini khan Punjab Kings chu wicket rukin an hneh a, IPL champion laiin hnehna an chan theih nan Hardik Pandya leh Kieron Pollard te a che ṭha hle.

Inkhel dangah Kolkata Knight Riders chuan wicket thumin Delhi Capitals an hneh. Delhi-in KKR an hneh loh avangin pahnihnaah an awm a, Chennai Super Kings-in hma an hruai mek. KKR leh Mumbai Indians hian point 10 ve ve hmuin palina leh panganaah an awm a, playoff khel turin beiseina an la nei ve zel.

Sheikh Zayed Stadium-ah ṭhumvawra vannei Mumbai Indians-in vawm hmasak an thlang. Punjab Kings-in 135/6 runs chauh an siam thei a, Mumbai Indians-in over 19 lekah 137/4 runs siamin target an umpha.

Mumbai tan Saurabh Tiwary-a'n 45 runs a siam a, hnehna chan kawngah erawh ball 30-a thi loa 40 runs siamtu Hardik Pandya leh ball sarih leka thi loa 15 runs siamtu Pollard te an ṭangkai hle.

Sharjah Cricket Stadium-ah KKR ṭhumvawrah an chak a, Delhi tan Steve Smith leh Rishabh Pant ten 39 runs ve ve siam mah se 127/9 runs chauh an siam. KKR-in over 18.2-ah 130/7 runs siamin target an umpha a, Nitish Rana chuan thi loin 36 runs a vaw chhuak.

Zanin dar 7:30 hian Sharjah Cricket Stadium-ah hmahruaitu Chennai Super Kings leh table mawngphaha awm Sunrisers Hyderabad te an inkhel ang.