Ajax leh Dortmund an chak

Champions League-ah Ajax leh Borussia Dortmund ten bul an ṭan ṭha a, an match hmasa pahnihah hnehna an chang ve ve. Dutch club Ajax hian an mualah Besiktas 2-0 in an hneh a, Dortmund-in Sporting Lisbon 1-0 in an hneh ve bawk.

Johan Cruyff Arena-ah Ajax-in football mawina an pholang a, Steven Berghuis hmanga minute 17-naa hma an hruai hnuah Sebatien Haller-a'n minute 43-naah goal hnihna a khung.

West Ham striker hlui Haller hian Lisbon an sawp ṭumin goal li a khung tawh a, UCL match hmasa pahniha goal nga khung thei hmasa ber record a siam. Ajax hian inkhel thunun mah se goal dang an khung belh lo.

Signal Iduna Park-ah hliam vangin Erling Haaland leh Gio Reyna te an chhawr thei lo a, minute rukna lekah Mahmoud Dahoud chu hliam vangin lakchhuah a ṭul bawk.

Amaherawhchu German club tan Donyell Malen-a'n minute 37-naah goal awmchhun a khung a, Dutch forward goal khung hi English midfielder Jude Bellingham-a siamsak a ni.

Group C-ah Ajax leh Dortmund-in point ruk ve ve an hmu tawh a, Besiktas leh Sporting Lisbon te hian point an la hmu lo.