Spurs tan insiamrem hun

Tottenham Hotspur chuan zanin dar 12:30 hian Conference League-ah Slovenian club Mura an mikhual dawn. Premier League hnuhnung pathuma chak lo vek Spurs tan zanin hi insiamṭhat hun a ni.

Nuno Espírito Santo hote hi an talbuai hle. Spurs hi Crystal Palace, Chelsea leh Arsenal an hneh loh ṭum hian an chak lo satliah lo a, an mualpho tel - goal thum an chhuah vek bakah goal khat chiah an khung.

Spurs buaina ber chu an chhuanvawr Harry Kane-a'n beisei a pha lo hi a ni a, England captain hi nipui transfer-ah Manchester City-in pound maktaduai 150 laiin lei ngam mah se London club hian an chelh.

Kum 28 mi Kane hian league match ngaah goal a la khung lo a, chutihrualin inelna dangah erawh goal thum a khung tawh. Nuno hnuaiah Spurs-in khelh dan nghet an la nei lo a, Mura laka game ṭha tak khel chunga an insiamrem theih chuan kartawpa Aston Villa an mikhual hunah phurna thar an nei thei ang.