A hmawr bawk thei lo Arsenal

Atletico Madrid manager Diego Simeone hnawh chhuah a ni a, defender Sime Vrsaljko chu red card pek a ni bawk. Mahse, Arsenal lamin goal khung an harsat miau a, May 3 zanah Arsene Wenger-a naute tan hna a hautak tawh dawn.

Ningani zan Europa League semifinal first leg inkhelah Arsenal tana Alexandre Lacazette goal khung chu player 10 a khel Atletico tan Antoine Griezmann-a'n a sut a, English club leh an mikhualte 1-1 in an inhnehtawk.

Red card
Emirates Stadium-ah boruak a sang a, nomawi duha tuihal pahnih an nih avangin a tir aṭangin a 'hot' nghal. Midfielder Jack Wilshere-a ball tlanpui lai a tih tluk vangin Vrsaljko chu minute hnihna lekah yellow card pek a ni a, Croatian right back hian Lacazette a rah luih vangin yellow card vawi hnihna a hmu bawk.

Atletico Madrid player ten referee Clement Turpin thutlukna an ngait iam lo a, final warning a pek loh vangin an lugawi lo hle. Mual sira ding Simeone pawhin a lungawi lohna a lantir nasa hle. Mahse, replay ennawn a nih hnuah Turpin hian a tih tur dik tak a ti tih a hriat theih.

Arsenal defender Hector Bellerin-a'n chiang zetin defender Lucas Hernandez a ti tlu a, Spain international hi card pek a ni lo. Atletico Madrid manager Simeone-a'n nasa takin a thinrim zia a lantir a, ṭawngkam mawi lo a hman bawk avangin  Argentine manager hi hnawhchhuah a ni.

Tlarhma bil
Arsenal striker manto ber Pierre-Emerick Aubameyang chhawr theih a ni lo a, Lyon striker hlui Lacazette leh Danny Welbeck te thlawp turin Mesut Ozil leh Aaron Ramsey te an awm thung.

West Ham laka goal hnih khungtu Lacazette-a'n inkhel ṭan tirah goal ban a pet per a, hnai set sawta a ball tauh chu keeper Jan Oblak-a'n a dan sak bawk. Slovenia international hian tun laia khawvel keeper ṭha berte zinga mi a nih zia lantir nan Ramsey tauh luh tur pawh ṭha zetin a dan sak bawk.

76% zet ball possession neitu Arsenal lamin inkhel thunun viau mah se an tlarhma an hriam tawk lo a, Nacho Monreal, Granit Xhaka leh Ozil-a ten ṭum danga an khung theihna anga hun ṭha an neih an hlah vek.

England international Wilshere-a'n Lacazette tauh luh tura a siam erawh a mawi a, ball cross tu leh feet 6-a sang Lucas Hernandez zuan khumtu France international ten fak an phu. Amaherawhchu, an tlarhnung a pawp zui avangin Europa League final lut tur chuan Spain khawpui Madrid-ah goal an khung ngei a ngai dawn tihna a ni.

Griezmann-a goal
Hun tawp nan minute riat chiah a awm tawh a, forward Griezmann-a'n Laurent Koscielny nena an ball inchuh a la chhuak a, keeper David Ospina a paltlang hnuah tawih zetin a khung, defender Shkodran Mustafi tan dan hman a ni tawh bik lo.

Manchester United nena sawizawm ni tawh Griezmann hian ball a hmu hnem lo a, a hmuh chhunah erawh Arsenal tlarhnung a chhaih buai thei hle. Away goal hlu tak a khung hma hian Ospina tan hna hautak vawi hnih a siamsak thei tho–Atletico tan kumina goal 20 khung tawh forward hi Barcelona-in an tana khel tura an duh hi a mak lo.

Chelsea striker hlui Diego Costa chu dam tawh mah se bench-ah ṭut tluan tir a ni a, Spain international hi second leg-ah chuan a inlan thei tawh ang. Liverpool striker hlui Fernando Torres chu hun tawp dawnah luhtir a ni thung. Season tawpa chhuak tur Torres hian a hun hnuhnung-ah a hmangaih hmasa tan Europa League nomawi chawi a tum ruh hle.

Manager Simeone hnawhchhuah a nih hnuah Atletico Madrid player an chiai a, boruak khirhkhan tak an tawn laiin tlarhnung-ah captain Diego Godin a dingnghet a, Uruguay international hian a tawnhriat neih a hmang ṭangkai–Gunners goal nawr na tak lakah a naute a fuih ṭhain, hotupa nih a tlin takzet.