Ibra tel lohna World Cup

Tun hnaiah World Cup khel tur anga sawi awm mah se Sweden legend Zlatan Ibrahimovic chu Russia-ah inkhel turin a kal dawn lo.

LA Galaxy striker hian ram tana inkhelh a chawlhsan hnuah World Cup khel tura ram tana a lo kir leh mai theih thu a sawi a, Manchester United aṭanga USA a pan hnuah, "World Cup-ah ka kal ngei dawn a, mahse eng angin nge ka kal dawn erawh ka sawi thei lo," a ti bawk.

Mahse, Swedish FA chief Lars Richt chuan, "Zlatan hi Thawhlehni khan ka bia a, mahse ram tana inkhel tura lo kir leh a tum lo," tiin kum 36 mi striker nena an inbiakna chungchang a sawi a, Swedish striker awm tawh zinga ropui bera chhal ngam hian ram tana khel leh tura sawm a nihna chu a hnar.

Ajax, Barcelona, Juventus leh Inter Milan tan pawha lo khel tawh striker hian Sweden tan match 116 a khelh aṭangin goal 62 a khung a, World Cup 2002 leh 2006-ah te khan a inlan.

"Zlatan-a tel lohna World Cup chu eng tihna mah a ni lo," tih ṭawngkam hial lo nei tawh Ibra hian Euro 2016 zawhah khan ram tana inkhelh a chawlhsan thu a puang a, a tel loin Sweden chu 2018 World Cup khel tur hian an inpet tling.

Sweden hian 2010 leh 2014 World Cup kha an inpet kai zo lo a ni.