World Cup thlen tum Donald Trump

USA, Canada leh Mexico-in FIFA World Cup 2026 inthlen ṭawm an tum a, US president Donald Trump chuan he inelna thlen an tumna kawngah sum leh pai hmanga an puih ṭhin ramte chu anmahni pui let turin a beisei.

World Cup 2026 hi USA, Canada leh Mexico bakah Morocco chuan thlen an dil ve bawk a, Africa ram hian thlawptu a nei ṭha hle. Huaisen taka a ngaihdan sawi chhuak mai ṭhin Donald Trump-a'n hei hi a hai bik lo a, ṭawngkam a nei ta vat a ni.

Trump chuan, "US chuan Canada leh Mexico nena ṭang hoin 2026 World Cup hi thlen ngei kan tum a, sum leh paia kan puih fo ṭhinten kan mamawh ve huna min pui let lo a nih chuan a lawmawm loh khawp ang.

"Puih kan ngaih huna min pui duh lotu ram chu United Nations thleng pawhin engvangin nge kan puih bik ang?" tiin twitter-ah zawhna a siam a, US puihna mamawh ram te a vau lawk.

Team 48 inelna tur World Cup 2026 thlengtu tur zawnna vote chu June 13 khian Moscow-ah neih a ni dawn a, Canada, Mexico, USA leh Morocco ten vote an thlak ve a rem dawn loh avangin vote thlak thei zat chu 207 a ni a, inelna thleng turin vote 104 hmuh a tawk ang.

USA hian kum 1994 khan 'The Greatest Show on Earth (Khawvela ennawm ropui ber)' tih hiala sawi hlawh inelna hi an lo thleng tawh.