Hriatpawlh turin Messi a lar mah mah!

European Union General Court chuan Barcelona forward Lionel Messi chu Spanish cycling brand Massi nena inhriatpawlh tur chuan a lar mah mah, an ti!

Argentine forward hi infiamna bungraw zawrhna lama a hming hmang turin kum sarih ngawt chu court-ah hian a buai tawh. Kum 2011 khan European Union Office for Intellectual Property (EUIPO)-ah a hming trademark turin a dil a, mahse hei hi Spanish cycling brand Massi chuan an company hming nen inhriatpawlh thei tak tur hming nia an hriat avangin an khing.

Massi hian, "Kan company hming nen a lamrik a in ang a, hriatpawlh a hlauhawm a ni," an ti a, mahse EU hnuaia court sang ber dawttu General Court chuan, "Thil dang nena hriatpawlh turin Messi hi chu a lar mah mah a, television leh radio thlengin a chanchin kan ngaithla awl lo a ni," an ti.

Tun hnaiah Ballon d'Or chawimawina buatsaihtu France Football magazine chuan Messi hian footballer zinga sum lalut hnem ber ni turin Cristiano Ronaldo a khum niin an puang. Messi hian kum khatah pound maktaduai 108 a thawk chhuak a, Ronaldo hian pound maktaduai 81 bawr vel a lalut thung.

Messi hian Barcelona chu tun season-ah Copa del Rey nomawi a chawipui tawh a, Pathianni zan dar 12:15-a Deportivo La Coruna an hneh chuan league nomawi an chawi ang.