East Bengal-in Khalid Jamil an ban

I League nomawi chawi thei lo East Bengal chuan coach aṭangin Khalid Jamil an ban a, Kolkata khawpuia Jamil-a zinkawng chu a tawp ta.

India international hlui hian I League-a Aizawl FC-a cham­pion pui hnuah Kolkata club a pan a, Indian coach awm tawh zinga hlawh hnem ber ni turin East Bengal hian an thlem lut.

Khalid hian kum hnih cham turin contract ziak mah se kum khat bak a tlin ta lo a, a contract-ah hian thla ruk hnuah an 'inṭhen' theih thu an ziak.

Zinkawng ngaihnawm
Kum 2009 khan Khalid Jamil hian coaching hna a thawk ṭan a, player a nih anga a hun hnuhnung ber a hmanna Mumbai FC-ah coach dinhmun hi a luah ṭan. I League-a budget tlem ber pawl nichungin Mum­bai FC hi a chet chhiatpui ngai lo a, tam vantlang an ni reng.

2015-16 season-ah khan Mumbai FC hian an tawn san ber tawngin I League-ah pangana an ni a, mak tak mai­in coach Khalid Jamil an ban. Maharashtra club hian champion tum ngam tawh niah an inngai a, tuna Aizawl FC coach Santosh Kashyap lalut chungin Jamil an hnuchhawn.

Rilru hah leh buai taka a awm laiin Aizawl FC an lo lang a, AIFF duhsakna dawnga I League-a an season hnihna hmang tur Mizo club enkawl turin Khalid rawih a ni.

AFC leh thil mak
Attacking football khel ṭhin Aizawl FC-in defensive game khel ṭhin Khalid Jamil an lalut a, Indian football hrechiangtuten rinhlelhna mit nen Khalid an thlir a, Mizo club hi a thlensan pui an ring lo.

Mahse, Khalid-a'n Indian foot­ball barakhaihin I League-a budget tlem ber pawl AFC chu a champion pui a, a tira rin­hlelhna mit nena an thlir coach kha mite fak rawn a ni tawh.

Khalid-a'n, "Engpawh thleng se, Aizawl FC-ah ka cham ang," tiin Mizo club a hmangaih thu Vanglaini hnenah sawi mah se sum tam tham tak nen East Bengal an rawn lang a, "Kolkata mai ni lo India rama club lian ber pawl an ni," tiin East Bengal a pan a, a ṭang zo lo.

Bul ṭanna duhawm
East Bengal-in an tum ber chu an la champion ngai loh­na I League-a champion a ni a, Khalid-a'n AFC a champion puina kawnga player pawimawh tak tak Lalramchullova, Brandon VL Remdika, Laldanmawia Ralte leh Mahmoud Al Amna te Kolkata khawpuiah a hruai tel.

Khalid-a'n Calcutta Football League-ah East Bengal a champion pui nghal a, an tum ber I League-ah erawh palina an ni hram - East Bengal hian champion Minerva Punjab chu point liin an phak lo.

ISL leh I League club te inelna Super Cup-ah East Bengal hian final lut mah se Bengaluru FC chuan 4-1 in an sawp a, Khalid-a'n a tawrh phah ta.

Buai inṭanna chu
East Bengal fan-ten club official te duh khawp lohna season tluanin an au pui a, hetih chhung zawng hian Jamil erawh an chhan thung. I League-ah EB-in beisei phak lo mah se Super Cup khelh tur thu puan a ni a, dinhmun derthawng anga sawi Khalid chanchin sawi rik a awm lo.

Kolkata club-in nomawi chawi ngei an duh avangin technical director atan club legend leh coach hlui Subhash Bhowmick an lalut a, Khalid nen thawk dun tura tih an ni. Mahse, kum 40 mi coach hian Bhowmick-a'n EB a pan tirhin ni hnih chhung training a zawm lo nghal!

Bhowmick-a'n na taka Khalid sawichhe nghalin "Biak ka tum a, mahse tun thlengin kan phone call a la chhang duh lo. Tu nge nia a inhriat? Khalid Jamil hian Pep Guardiola emaw Jose Mourinho emaw Sir Alex Fer­guson emaw a inti tur a ni lo," a ti.

Khalid-a 'ropuina'
Bhowmick-a'n na takin Khalid sawichhe mah se Aizawl FC coach hlui danglamna a lang chhuak a, East Bengal training a zawm hnuah 'cool' takin, "Ka senior a ni a, a duh apiang sawi turin zalenna a nei. Coach ṭha tak a ni a, sulhnu ropui tak a nei. Ka unaupa ang mai a ni," tiin Bhowmick a chhang daih!

East Bengal boruak chhe tawh nia ngaih a dai a, Mohun Bagan pawh lo enkawl tawh Bhowmick hian, "Ka fapa ang mai a ni," tiin Khalid-a chungchang a sawi. 'The Cool One' tia hminglem an pek coach hian mize danglam tak a neih chu a 'cool' na hi a ni a, referee a sawichhe duh ngai lo a, hmingṭhatna turah a naute a fak a, an chak lohin mawhphurhna a la ṭhin thung.

Vantlang hriatah amah bei­­tute na takin a chhanglet ngai lo. Season hman zawh takah AFC nen an inkhelh ṭum pawhin boruak awm hat mah se Khalid hian press conference-ah, "Engmah sawi tur ka nei lo," tih bak a chhehvel a sawi duh lo a, fan-ten season hmasa lawka champion puitu hi amah beihna 'banner' nen lo hmuak mah se a chhanglet lo - player laka pressure na tur amah lama in bur bun a tumnaah a hlawhtling.

Mahse maw...
Super Cup final khelh zawh a ni a, East Bengal an champion tak si lohah chuan boruak chhia a awm lehnghal. Subhash Bhowmick bawk a ṭawng chhuak leh a, final khelh zawhah hian, "Room pakhatah rul tam tak nena khawsak ho chu ka thei ang. Mahse, Khalid nena thawhdun reng chu ka duh lo.

"Khalid hi a chhuak a nih loh chuan keimah ka chhuak ang. Coach tam tak ka lo thawhpui tawh a, buaina ka nei ngai lo. Jamil-a hi chu coach pawh a ni lo," tiin na takin coach a sawisel a, a tawpah Khalid-a'n a tuar.

Khalid Jamil hian Super Cup final khelh a nih hma khan player-te a fuihnaah Bhowmick a tel ve a remti lo a, hei hi Bengali coach hian a hrethiam thei lo.

Hmalakna tur
Club legend ber a lungawi loh avangin Khalid ban a ni a, East Bengal hian season thar atan coach tur an melh nghal - Subhash Bhowmick chu thuneihna pumhlum pek a ni. East Bengal secretary Kalyan Majumder chuan, "Kan beisei angin season kan hmang lo a, Khalid hnenah hian kan thawhho zel a rem tawh loh tur thu kan hrilh," a ti.

Vanglaini thudawn danin East Bengal hian Super Cup khelh a nih hma aṭang khan ruahmanna an nei tawh a, ISL leh I League club te inelnaah hian an champion lo a nih chuan Khalid Jamil hi ban an lo tum lawk tawh.