Kings XI tan Rajpoot chet ṭhat a tawk lo

Indian Premier League khelh mekah Sunrisers Hyderabad chuan Ningani zan khan run 13-in Kings XI Punjab an hneh. SRH tan run 54 siamtu Manish Pandey chu player langsar a ni a, Kings XI tan wicket nga latu Ankit Rajpoot-a chet ṭhat a tawk lo.

Hyderabad khawpuia inkhelah hian mualneitu team an bat hmasa zawk a, over 20-ah run 132 an siam a, wicket ruk an hloh. Kings XI tan Ankit Rajpoot-a'n a vawm ṭha a, over li a vawmah run 14 chiah pein wicket nga a la thei.

Kum 24 mi Rajpoot-a'n Punjab beiseina a siam a, mahse Kings XI batsman ten an bowler chet ṭhat an hum thei lo - over 19.2-ah run 119 chiah siamin an out vek a, run 32 siamtu KL Rahul tih loh chu run 25 siam tling pawh an awm lo!