Season thar Champions League khel tur Liverpool? Tottenham Hotspur? Chelsea?
Premier League club zingah champion tawh Manchester City chu season thara Champions League khel tur chiang tawh an ni a, pahnihna dinhmuna awm mek Manchester United dinhmun a him deuhthawa ngaih a ni bawk.
Liverpool, Tottenham Hotspur leh Chelsea te hming zawnah erawh 'zawhna chhinchhiahna' dah ngam vek a la ni a, club pathum hi Champions League khel tura dinhmun him tawha dah ngam an ni lo.
Premier League kartawp inkhelah club pathum hi an inlan vek dawn a, chak loh chuan dinhmun him loa la awm thei vek an ni. Liverpool hian vawiin tlai dar 5:00-ah Stoke City an mikhual dawn a, zanin dar 10:00-ah Chelsea chuan tlak hlau Swansea City an lenchilh ve dawn bawk. Spurs-in Pathianni zan dar 12:30-ah Watford an mikhual ang.
Roma aiah Stoke
Liverpool-in Nilaini zanah Champions League semifinal second leg khel turin Roma an lenchilh dawn a, first leg-ah 5-2 a hnehna an chan tawh avangin dinhmun ṭha zawk an ni. Nimin tlai press conference-ah pawh Stoke nena an inkhel tur aiin Roma nena an inkhel turah zawhna an dawng tam zawk.
Mahse, Jurgen Klopp chuan, "Kan match khelh leh tur a pawimawh zawk tih hi ṭawng upa ang maiin kan hmang ṭhin a, mahse hei hi thudik tak a ni si. Tunah chuan Roma aiin Stoke hi kan ngaih pawimawh hmasak tur a ni," a ti a, season thara Champions League khel lo thei dinhmunah an ding tih a hai lo.
Sadio Mane-a'n hliam serious a nei anga sawi chu Klopp chuan 'a ngaihtuahawm loh' tiin a sawi a, season tawp thleng hliam vanga inlan thei lo tur Alex Oxlade-Chamberlain chungchangah, "Nu khawhar takin a pasal lungin tang, nghakhlel leh rinawm taka a lo nghak angin kan nghak ang," tiin a sawi bawk.
Blues-a harsa dawn
Season hmasa champion Chelsea chu table-ah pangana an ni mek a, an chung chiaha awm Tottenham an thlauhna chu point nga a ni - Spurs nen match li chiah khelh tur an nei ve ve tawh a, an dinhmun a him lo takzet.
Chelsea manager Antonio Conte chuan, "Point thum hlawhchhuah kan tum a, tlak hlau team kan tum dawn avangin awlsam tak erawh a ni dawn lo. Swansea hi an khelh ṭhat tluan lai tak a ni a, mahse beiseina nei tur chuan point kan hlawhchhuah a ṭul si," a ti.
Swansea hi table-ah 17-na an ni mek a, 18-na Southampton aia an sanna chu point li chiah a ni - tlak hlau chunga khel tur an nih miau avangin a awlsam dawn lo.
Poch a him lo?
FA Cup semifinal aṭangin Manchester United-in Tottenham Hotspur an pet chhuak a, Champions League-ah lah last 16 aṭangin petchhuah a ni a, season tharah Champions League an khel lo bawk a nih chuan Mauricio Pochettino dinhmun a derthawng thei.
Argentine manager erawh a hlauthawng lo. Spurs boss chuan, "Tun hma aṭangin ka sawi fo tawh ṭhin a, ka hnathawh reng reng hi he hmuna kumkhuaa cham tur angin ka thawk ṭhin. Kum thum vel ka awm hnuah tunah chuan Manchester United, City, Chelsea leh Liverpool te nen kan inel tawh a ni.
"Hnathawh tur erawh tam tak ka la nei. Tottenham-ah hian hmachhawp duhawm tak kan nei a, kum thum atan contract ka la nei bawk. Thutlukna erawh he club neitute kuta awm a ni," a ti a, Spurs-ah hnathawh tur a la ngah thu a sawi.