Mizoram thlen chin semifinal

26th National Mini Volleyball Championship khelh mekah Mizoram hmeichhe team ten beisei awm takin khel chho mah se final an lut zo lo, semifinal-ah Tamil Nadu chu 3-1 in an ngam lo.

Nimin tlai semifinal inkhelah Mizoram hmeichhe team an che ṭha tawk lo, Tamil Nadal lakah beisei anga an khelh chhuah theih loh avangin 17-25, 25-19, 19-25, 11-25 in an tlawm, chawhma lama quarterfinal an khelh avangin player an chau a, Telangana hnehtu Tamil Nadu lakah tihsual an ngah bawk.

Hneh loh nei loa group stage paltlangtu Mizoram hmeichhe team-in quarterfinal-ah pawh harsatna an tawk lo, nimin chawhma lam khan Gujarat nen intawngin 25-15, 25-18, 25-14 (3-0) in hnehna an chang. Mahse, inkhel pawimawh leh final luhna tur berah tawnhriat an neih tlemna a lang.

Nimin tlai vek khan West Bengal leh Uttar Pradesh ten final luh inchuh bawkin, West Bengal lam hian 3-0 in hnehna an chang a, Tamil Nadu nen nomawi an inchuh dawn. Mizoram leh West Bengal ten pathumna an inchuh thung dawn a ni.

Vawiin hian final leh pathumna zawnna neih zui tur a ni a, tlai dar 4:00-ah hmeichhe final khelh tur niin, dar 6:00-ah mipa team ṭha pahnih ten nomawi an inchuh ve bawk ang.

Mizoram mipa team hian nimin chawhma lam khan quarterfinal an khel bawk a, harsa lo takin Jharkhand lakah 25-20, 25-16, 25-11 (3-0) in hnehna an chang. Nizan khan semifinal an khel zui leh a, Rajasthan hnehtu Bihar nen an intawng a, he thu buatsaih lai hian result kan hre hman lo.

Pool A-ah Mizoram hi Uttar Pradesh, Jammu & Kashmir, Karnataka leh Haryana te nen an awmkhawm a, hneh loh nei loin knockout round an lut thei a ni.