Barca leh Iniesta inṭhen dawn

Barcelona legend Andres Iniesta chuan nimin tlai press conference-ah a sawi chiang ta a, Catalan club-in lifetime contract hial pe mah se season tawp rualin Spanish club a chhuahsan tur thu a puang.

Kum 33 mi midfielder hian season 16 chhungin Barca tan vawi 669 a inlan tawh a, nomawi 31 chawi tawhin Spain rama inelna pathum a chawi pui vek. Tun season-ah pawh Catalan club-ah hmun pawimawh la changin Copa del Rey final-a Sevilla 5-0 a an sawp ṭumin goal a khung.

Iniesta chuan, "Hun rei tak ka ngaihtuah a, thutlukna ka siam a, ka season tawpna tur a ni. Ka tan chuan Barca hi khawvela club ṭha ber a ni a, he club hian ka mamawh zawng zawng min pe vek. Club pakhat tan chauha hun ka hmang thei hi vannei ka inti a, he club hlawhtlinpui hi ka duh a, ka tum ka tih hlawhtlin avanga ka lawmna aia lawmna tur ka nei lo," tiin mittui tla chungin a chawlh tur thu a puang.

Barca tan khelh a tum tawh lo mah se Iniesta hian Catalan club hmachhawn a tum tawh lo. Spanish midfielder chuan, "Barcelona hmachhawn kan tum lo a, chuvangin Europe-ah chuan ka khel lo ang. Season tawp hunah ka kalna tur chu ka tichiang ang. Tunah chuan kum 34 ka tling ṭep tawh a, ka theihna zawng zawng khelmualah ka hnutchhiah tawh a, club tan ka theihna zawng zawng ka hlan a ni," tiin a club khelhna tur a la tichiang lo a, China chu a kalna tura ngaih a ni.

Iniesta-a'n media a hmachhawn lai hian a chhungte, Barca tana a khelhpui, manager Ernesto Valverde leh president Josep Maria Bartomeu ten an thlir.