Old Trafford-ah a tawp nan Wenger hoin Arsenal
Premier League hlutna tisangtu leh Arsenal ropuina nasa taka belhchhahtu Arsene Wenger chuan a tawp nan Old Trafford-ah Gunners a ho dawn a, Pathianni zan dar 9:00 hian Manchester United an hmachhawn ang.
Gunners B-Team
Wenger-a'n Arsenal tana ṭha ber tur a duh ṭhin a, chuvangin a club hmangaih hi season thara Champions League tlinpui chu a duh ber tur a ni. Europa League an ngaih pawimawh dawn avangin Old Trafford-ah Wenger-a'n an ṭhat dan berin a rem lo ang.
Amaherawhchu Europa League khel thei lo Pierre-Emerick Aubameyang a chhawr theih dawn a, Sead Kolasinac pawh Atletico Madrid nen bench-a a awm leh tawh avangin match fitness neih nan a inlan a rinawm a, United player hlui Henrikh Mkhitaryan erawh khup hliam vangin a dinhmun a chiang lo.
Arsenal leh United
Premier League chanchin hlutna belhchhahtu chu Sir Alex Ferguson leh Arsene Wenger te an ni a, thawnthu hlui keu let chuan Arsenal leh United sawi rualin captain pahnih Roy Keane leh Patrick Vieira te an lang nghal.
Sir Alex pawhin tawp hun a nei a, Wenger leh Gunners pawh kum 22 an thawhho hnuah an inṭhen hun a thleng hnai ta. Wenger hian United vawi 60 a hmachhawn a, Old Trafford-ah erawh record a nei ṭha lo, inelna hrang hrangah vawi ruk chauh a chak.
An intawn tawhna hrim hrimah Wenger-a kaihhruai Arsenal hi vawi 18 an chak a, vawi 15 an inhnehtawk a, vawi 26 an chak lo. Pathianni zanah erawh record lam a ni tawh lo a, club pahnih ṭantuten Wenger hi a hnahtawh ṭhat avangin Old Trafford-ah ngei zahna lantir a ṭul a ni.
Inchhirna tur a awm
Manchester United manager Jose Mourinho chuan, "Thil ṭhenkhat kha chu thleng ta lo zawk se a duhawm zawk. Ka chetdan leh ṭawngkam ṭhenkhat tel lo khan tunah chuan ka awm a nuam ta zawk. Kum 2004 khan Arsenal chuan hneh lo nei loin an league-ah an champion a, 'Invincibles' te kha an huaisen a hnu lam thleng khan khelh an harsa. Highbury-a kan lenluh te kha rilruah a la cham reng a, anni nen hian hun hlimawm tam tak kan tawng a, inchhirna tur erawh a awm a, ani pawhin tlem chu a nei ve tho ang," tiin tun hma chanchin a sawi lang.
Portuguese manager hian tun hmain Wenger hi 'hlawhchham specialist' tih tenin a lo sawi tawh ṭhin a, hetiang bakah hian ṭawikam hriat nuam lo hman chang a nei bawk. Tunah erawh kum 55 mi a ni tawh a, Mourinho pawhin a ṭawngkam mawi lo hman inchhuan nan hmang loin inchhir nan a hmang tawh.
Manchester United manager hian keeper rinrawl David de Gea chu season tharah a chhuah loh tur thu a sawi a, Arsenal aṭanga an lakluh Alexis Sanchez pawh season tharah ṭha zawka a khelh theih a beisei thu a sawi lang a. Chilean forward hian kum thum a la chanve chhungin Arsenal tan match 165-ah inlanin goal 80 a khung a, Alexis hian January khan United-ah lutin match 14-ah goal thum a khung sak.