Gareth Bale a hrilhhai

Real Madrid forward Gareth Bale chuan khelhna hmun a chan tam tawk loh avangin a hrilh hai a, amaherawhchu club chhuhsan duhna rilru erawh a la pu lo.

Welsh forward Bale hi Bayern Munich nen Champions League first leg an khelh loh ṭumin bench-ah a ṭhu tluan a, Tottenham forward hlui aiah hian Lucas Vazquez leh Isco te chu inkhel bul ṭan tura thlan an ni a. Substitute Marco Asensio chuan chakna goal a khung a, Karim Benzema pawh bench aṭanga lut tura Bale aia thlan a ni.

Kum 29 mi hian Real-ah kum 2022 thleng contract a nei a, khelhna hmun chan loh vangin hnual deuh mah se club dang zawm aiin khelhna hmun chan tuma beih chu a duh zawk niin an sawi. Chutihrualin Bale hi lei theihin awm pawh ni se a hunlaia khawvel player manto ber lakluh nan sum sen tam a ṭul dawn a, Premier League club zingah pawh ngam an awm kher lo ang.

Zinedine Zidane-a hote hian zanin dar 10:00 hian Leganes an mikhual dawn a, karleh lama Champions League semifinal thlir chunga player an rem a rinawm avangin Gareth Bale-a'n khelhna hun a neih a rinawm.