Paul FC-in nomawi an chawi ve ta

Mizoram Football Association buatsaih Futsal Division I Season Ending Tournament-ah Paul FC chuan nimina final khelhah Cici Store, Dinthar chu 5-3 a hnehin an champion.

Lammuala inkhelah hian Cici Store-in Lalherliana hmangin minute lina lekah khung hmasa mah se Paul FC phurna petu a ni a, Lalramtharmawia (13') leh F Lalrinpuia (16') te hmangin an lehthal nghal.

Cici Store-in Joseph R. Lalhlimpuia hmangin minute 20-naah an sut leh a, amaherawhchu minute 24-naah Lalfakzuala hmangin Paul FC-in hma an hruai nawn a, Republic Veng tlangval Valpuia leh Armed Veng tlangval Fakzuala ten an goal hnihna khung leh ve vein 5-2 in hma an hruai a, scoreline lan mawi nan Lalherliana'n minute 59-naah Dinthar club tan a khung belh a, 5-3 in inkhel a tawp.

Paul FC hian champion turin match hmasa berah Muthi FC chu 9-5 in an hneh a, quarterfinal-ah Ramhlun South FC, Junior chu 6-3 in an hneh leh a, semifinal-ah nomawi chawi tura an elpui ber tura ngaih IDBI Capital an hneh a, final-ah rinkai an nih angin Cici Store lakah hnehna an chang.

Champion team Paul FC hian Rs 10,000 leh trophy an dawng a, pahnihna Cici Store, Dinthar hian Rs 5,000 leh nomawi an dawng a. Semifinalist Rangvamual club Los Blancos leh IDBI Capital hnenah Rs 2,000 ve ve hlan an ni bawk.

Final - April 27, Zirtawpni

Paul FC 5-3 Cici Store, Dinthar

PFC : Lalramtharmawia 13';

     F Lalrinpuia 16', 33';

    Lalfakzuala 24', 37'

CS : Lalherliana 4', 59';

   Joseph R Lalhlimpuia 20'