National Mini Volleyball Championship 2018 ; Mizoram tan silver leh bronze medal
Volleyball Federation of India hnuaia inelna, 26th National Mini Volleyball Championship for Boys and Girls chu Inrinni zan khan a hmawr bawkna neih a ni a, inelna thlengtu Mizoram team chuan silver medal leh bronze medal an la.
State 20 telna mipa inelna huangah Mizoram chuan final thlengin Manipur 2-3 in an hneh lo a, pahnihna an ni.
Hmeichhe team lamin final inhlangkai zo lo mah se pathumna inchuhah Uttar Pradesh chu 3-1 a hnehin bronze an la ve bawk–Bihar hnehtu Tamil Nadal chu hmeichhe champion an ni.
Mizoram Volleyball Association hnuaiah Mizoram mipa naupang ten 1993 khan Hyderabad-ah silver medal an beng chhuak tawh a, kum 25 hnuah sulhnu an chhui leh chiah. Hmeichhe team pawhin Maharashtra (1994) a bronze an dawn hnuah hlawhtlinna an chang ve leh bawk.
Silver medal
R. Dengṭhuama Indoor Stadium, Mualpuiah final khelh a ni a, inkhel inhnehtawk leh hmuhnawm takah Mizoram chu Manipur hmaah 17-25, 25-23, 25-18, 24-26, 16-14 in an chak lo.
NorthEast team pahnih te an inbei tawk hle a, set hnih ve ve an lak hnuah deciding set khelh a ni. Mizoram an che fuh hmasa zawk, 14-12 in hma an hruai hman a, point khat hmuh belh zauh thei se a vawi khat nan an champion ang.
Amaherawhchu, hun pawimawhah Mizoram an che sual, a zawnin point li an hloh a, Manipur lamin an deuce pui hnuah tualchhung team hian an vaw out leh a. Linesman-in
Mizoram lam ball vuak thlak hi a dik tiin phar mah se, first referee zawkin 'out' a tih miau avangin Mizo rawlthar te silver medal-ah an lungawi a ṭul.
Point khat
Mizoram manager Lalrinliana Royte chuan an champion lo chu a ui thu a sawi a, hun pawimawhah tak an chetsual vang chauh a champion lo an nih thu a sawi.
Lalrinliana Royte chuan, "Kan nauten tawn-hriat an la ngah tawk lo a, point khat hlutna kan la hre tawk lo a ni. Chutih rualin inelna an hma-chhawn chhoh danah ka lawm a, inbuatsaihna hun kan neih tlem ngaihtuah chuan kan thlen chinah hian a lawmawm," tiin Vanglaini a hrilh.
Mizoram hian league round lamah Jammu and Kashmir (3-0), Karnataka (3-0) leh champion lai Uttar Pradesh (3-1) te an hneh vek a, quarterfinal-ah Bihar (3-0) a hnehin semifinal-a an khingpui Jharkhand (3-0) lakah pawh buaina an tawk lo.
Mahse, nomawi inchuhna inkhelah ball an vaw tla tam tawk lo a, placing an ti hnemin tihsual a tam bawk – an khingpui Manipur tan attack-na hun a siam hnem mah mah a ni.
MVA hnuaia inelna lian ber Pro Volleyball Leaue khelh zawh aṭanga ni li hnu lekah Mini National hi khelh zui a ni a, Mizoram team hian inelna neihna tur hmun R. Dengṭhuama Indoor Stadium-ah inbuatsaihna an nei ṭha hman lo.
Bronze
Mizo tleirawl ten set hloh miah loin semifinal an thleng thei a, mahse Tamil Nadu lakah set khat chiah an lak avangin final an lut zo lo, Inrinni chawhnu lam khan Uttar Pradesh nen bronze medal inchuhin 25-7, 18-25, 25-22, 20-7 in hnehna an chang.
Hmeichhe final-ah hian West Bengal chuan Tamil Nadu hi 25-10, 23-25, 25-22, 25-13 a hnehin champion nomawi an chawi thung. West Bengal hi group A aṭanga tlang chho an ni a, khing zo an tawng lo.
Hmeichhe inelna huangah hian team 18 an tel a, Mizo tleirawl ten Karnataka, Maharashtra, Kerala leh Bihar te sawp vek thei mah se group A aṭanga quarterfinal lut pakhat zawk Tamil Nadu laka an chetsual an tuar, chutih rualin medal nen hun tawp an khar thei hi chanchin lawmawm a ni.